Ipatpatungpal ti Bureau of Fisheries and Aquatic Resources (BFAR)-Region 2 ti 45-aldaw a pannakaiparit ti panagkalap iti ludong (lobed river mullet; Cestreaus sp.) iti Cagayan River, manipud Oktubre 1 agingga Nobiembre 15.
Kinuna ni Regional Director Angel B. Encarnacion a maitunos daytoy iti Bureau of Fisheries and Aquatic Resources Administrative Circular No. 247, tapno mapaadu ti populasion ti ludong ken mapalubosan daytoy nga agbugi iti sungaban ti Cagayan River.
Panggep met ti sirkular a masigurado ti umdas a suplay ti nasao a lames, a maaw-awagan iti "President’s Fish" gapu iti nangato a balor wenno presio daytoy ket segun kadagiti sarsarita, "presidente ti Filipinas" laeng ti makabael a makagatang itoy.
Ti Ludong ti maibilang a kanginaan a lames iti Filipinas, a mailaklako iti ₱6,000 agingga iti ₱6,500 kada kilo, gapu iti naisangsangayan a kananam ken kaimasna.
Marcos, Robredo, nagsarak iti Naga city
Mangisayangkat ti BFAR-2 iti information dissemination drives, di panangipalubos iti panaglako kadagiti kangrunaan a merkado, panagbantay, ken panagpatrolia iti Cagayan tapno maipatungpal ti pammilin.
Segun ken ni Arsenio S. Banares, daulo ti BFAR-2 Fisheries Management Regulatory and Enforcement Division, malaksid iti panagkalap iti ania man a wagas, panaggatang wenno panaglako, panag-export, panagtagikua iti ludong bayat ti closed season, iparit pay ti linteg ti panagala kadagiti masikog a ludong wenno sexually mature female and male a ludong. Asino man nga aglabsing, agmulta ken mabalin a mabalud. (Liezle Basa Iñigo/MB)
