Rumbeng nga agtalinaed ni dati a presidente Rodrigo Duterte a nakaditene iti The Hague, Netherlands tapno sanguenna ti linteg ken madusa gapu iti pannakapapatay ti rinibu a tattao idi insayangkat ti administrasionna ti war on drugs, segun ken ni dati a senador Antonio Trillanes IV.
Iti maysa nga interbiu iti One News, kinuna ti dati a senador ken nainget a kritiko ti dati a presidente a saan a pudno ti ibagbaga dagiti Duterte nga agkabawen ti amada.
Binabalaw ni Trillanes dagiti Duterte ta narasaw ken natangsit ti amada idi presidente pay, ket ita agdawatda iti asi.
Kinatawaan pay ni Trillanes dagiti report a nagkuna a namin-adu a naawanan iti puot ti dati a presidente iti siledna iti detention facility ti International Criminal Court (ICC), ket kunana nga estratehia laeng daytoy tapno maitantan ti confirmation of charges hearing a nairanta a maaramid koma idi Septiembre 23.
Mapukpukaw a nobia, nasarakan iti Pangasinan
Kinuestionar ni Trillanes ti pannakaitiempo dagitoy a damag maipanggep ken ni Duterte.
Segun ken ni Trillanes, nakaro ti panagulbod dagitoy a tattao, idinto nga awan met kasta a sasawenda idi adayo pay ti confirmation of charges hearing.
Pagduaduaan ni Trillanes ti maipadpadamag a kumapkapsuten ni Duterte, ket impaganetgetna a taktika laeng daytoy dagiti Duterte tapno makombinsir ti ICC a mangipaay iti interim release ni Duterte.
Inawagan ni Trillanes a "drama" laeng dagiti parparuaren dagiti Duterte tapno makaalada iti simpatia iti ICC ken kadagiti Filipino; mairaman ditoy ti kunada a saan a napakaammuan ti pamilia ni Duterte maipanggep iti salun-atna.
Inlawlawag ni Trillanes a dagiti pamilia ni Duterte ket mabalin a sumarungkar kenkuana iti inaldaw ken makasaritana pay ida babaen ti telepono iti ania man nga oras.
Innayon ni Trillanes a kompleto ti pasilidad iti detention facility ti ICC ket addaanda iti bukodda a medical team nga agresponde iti ania man a parikut iti salun-at ni Duterte, ken adda nakabantay nga ambulansia a mangitulod kenkuana iti ospital a lima a minuto laeng ti kaadayona. (Raymund Antonio/Manila Bulletin//Lito Hilidon/Bannawag)
