Binilin ni Presidente Marcos ti panagtignay dagiti amin nga ahensia ti gobierno nga agresponde kalpasan a nadayyeg ti Cebu iti magnitude 6.9 a ginggined, idi rabii ti Martes, Septiembre 30, a nakatayan ti umaboten iti 69 a tao ken nakadangran ti nasurok a 140,
Tallo a rehion ti naapektaran ti ginggined: Western Visayas (Region 6), Central Visayas (Region 7), ken Eastern Visayas (Region .
Segun ken ni Office of Civil Defense (OCD) deputy administrator Bernardo Rafaelito Alejandro IV, kaaduan ti natay iti Bogo City (30 a tao), sumaruno ti ili ti San Remigio (22), sangapulo iti Medellin, lima iti Tubogon, ken saggaysa iti Sugod ken Tabuelan.
Mapanen a 147 ti bilang dagiti nadangran kadagiti ili ti Bogo, Tabuelan, Catmon, Daanbantayan, ken San Francisco iti Cebu.
Mapukpukaw a nobia, nasarakan iti Pangasinan
Ekspektaren dagiti opisial nga umadu pay ti bilang dagiti natay, bayat a mataktak met ti pannakaisalakan dagiti tattao a napandagan wenno nagaburan, gapu iti napipigsa a tudo ken kadagiti nadadael a kalsada ken rangtay.
Idi Oktubre 1, impeksa ni Presidente Marcos ti pannakipagriknana kadagiti natayan iti patpaten iti biag ken kadagiti nadangran gapu iti ginggined.
In-deploy ti OCD ti sibubukel a puersada a mangisayangkat iti search and rescue operations kadagiti nagaburan wenno natupakan dagiti narba a pasdek iti Bogo City, a nakaro a naapektaran ti ginggined.
Pinaglayag met ti Philippine Coast Guard (PCG) ti baporda a BRP Teresa Magbanua iti Cebu tapno mangitulod kadagiti doktor, nars, medics ken alikamen a para emerhensia manipud iti Manila.
Segun ken ni Alejandro, saanen a maaguantaran ti Cebu Provincial Hospital iti Bogo City ti kaadu dagiti bangkay ken nadangran a tao, isu a naipatulod ti medical team manipud iti Vicente Sotto Memorial Medical Center iti Cebu City, ken dagiti dadduma pay nga ospital ti DOH, tapno tumulong.
Gapu iti panagkurang ti pasilidad, agaabayen dagiti bangkay ken pasiente, ngem kinuna ni Alejandro a tamtamingenen ti DOH daytoy a parikut babaen ti pannakitinnulong ti Management of the Dead and Missing (MDM) Cluster nga indauluan ti Department of Interior and Local Governmet (DILG).
Iti sabali a bangir, naideklararen ti state of calamity kadagiti ili ti San Remigio ken Tabuelan gapu iti nakaro nga epekto ti ginggined, tapno mabalinda nga usaren ti calamity fund nga awan ti adu a rekititosda. (Aaron Recuenco/Manila Bulletin//Lito Hilidon/Bannawag)
