Raemen ti Malakanyang ti pangngeddeng ti Korte Suprema (SC) a nangwaswas iti Bangsamoro redistricting law, a nangitunda iti pannakaitantan ti umuna a parliamentary election iti rehion.
Daytoy ti kuna ti Office of the President (OP) itay Oktubre 1, kalpasan nga ipaulog ti SC ti desisionda idi Septiembre 30, ket impasiguradoda a naananayasto ti maaramid a Bangsamoro Parliamentary Elections.
Iti statement, kuna ti OP a bigbigenda ti pangngeddeng ti SC, ket napateg unay daytoy nga addang iti panangsigurado a maaramid ti Bangsamoro Parliamentary Election kas maibasar iti legal ken Konstitusional a prinsipio daytoy.
Maibasar iti pangngeddeng ti SC, indeklararda nga unconstitutional dagiti redistricting law a binukel ti Bangsamoro Transition Authority (BTA), a nangitunda iti pannakayalud-od ti eleksion a maaramid koma inton Oktubre 13.
Kasapulan ti natibker ken nainkalintegan a pagtaktakderan iti parikut iti WPS --NMC
Segun iti SC, saan a maitutop iti Konstitusion ti Bangsamoro Autonomy Act (BAA) No. 58 ken ti BAA No. 77 a binukel ti BTA, a nangaramid ken nangbaliw iti pannakadasdasig dagiti distrito iti rehion.
Segun iti Malakanyang, suportaranda ti demokratiko a proseso iti Bangsamoro Autonomous Region in Muslim Mindanao (BARMM), ket inkarida a makitinnulongda kadagiti maseknan nga ahensia tapno marespetar dagiti tarigagay dagiti umili ti Bangsamoro, kas maitunos iti Konstitusion ken iti Bangsamoro Organic Law (BOL). (Argyll Cyrus Geducos/Manila Bulletin//Lito Hilidon/Bannawag)
