Naipan iti Tropical Cyclone Wind Signal (TCWS) No. 1 dagiti lugar iti daya ti Luzon gapu iti yaasideg ti tropical depression a nanaganan iti "Paolo," segun iti Philippine Atmospheric, Geophysical and Astronomical Services Administration (PAGASA) ita nga aldaw, Oktubre 2.
Agpigsa ni Paolo iti 65 a kilometro kada oras iti asideg ti sentrona, ken pugso nga agingga iti 80 a kilometro kada oras.
Nasaripatpatan ti PAGASA ti yan ti tropical depression iti 705 a kilometro iti daya ti Infanta, Quezon. Agturong daytoy iti laud-amianan a laud ken mabalin nga agdisso iti Isabela wenno iti amianan a paset ti Aurora inton Biernes, Oktubre 3, iti agsapa wenno malem.
Naipan iti Signal No. 1 ti Cagayan, Isabela, Quirino, Nueva Vizcaya, Apayao, Abra, Kalinga, Mountain Province, Ifugao, Benguet, Ilocos Norte, Ilocos Sur, La Union, Pangasinan, ti amianan a paset ti Zambales (Palauig, Masinloc, Candelaria, Santa Cruz), Tarlac, Nueva Ecija, Aurora, ti amianan a paset ti Bulacan (Doña Remedios Trinidad, San Miguel, San Ildefonso), ti amianan a paset ti Pampanga (Magalang, Arayat, Candaba, Mabalacat City), ti amianan a paset ti Quezon (General Nakar) agraman ti Polillo Islands, ken ti amianan a paset ti Catanduanes (Pandan, Bagamanoc, Panganiban, Viga).
Senado, pinasingkedanna ti ₱6.793-trilion a nailian a badiet para 2026
Pattapattaen ti PAGASA a rummuar ni Paolo iti Philippine Area of Responsibility inton agsapa ti Sabado, Oktubre 4. (Ellalyn De Vera-Ruiz/Manila Bulletin//Lito Hilidon/Bannawag)
