Saan pay a binalabala ti gobierno ti aramidenna iti posibilidad a mangipaulog manen ti International Criminal Court (ICC) iti warrant of arrest, segun ken ni Sekretario ti Department of Justice (DOJ) Jesus Crispin Remulla.
Nakuna daytoy ni Remulla kalpasan ti sinao ni dati a senador Antonio Trillanes IV a mabalin a mangipaulog ti ICC iti warrant of arrest kontra kada Sen. Ronald “Bato” Dela Rosa ken Sen. Christopher “Bong” Go iti apagtapog ti umay a tawen.
Ni Dela Rosa ti umuna a hepe ti Philippine National Police (PNP) a dinutokan ni Duterte idi insayangkatna ti war on drugs a nakatayan ti pinullo a ribu a Filipino. Ni met Go ti nabayagen a katulongan ni Duterte.
Sakbayna, kuna ni Dela Rosa a sisasagana isuna a sumango iti ICC, idinto nga inlibak met ni Go ti pannakairamanna iti war on drugs.
Kasapulan ti natibker ken nainkalintegan a pagtaktakderan iti parikut iti WPS --NMC
Idi nasaludsod ken ni Remulla no adda naawatna nga impormasion mainaig iti warrant of arrest nga ipaulog ti ICC, kinunana nga awan pay ti naawatda.
Ti warrant of arrest ti ICC, kas iti naaramid ken ni Duterte, ket agdalan iti International Criminal Police Organization (Interpol) ken ipatungpal ti maseknan a pannakabagi ti linteg ti gobierno. (Jeffrey Damicog/Manila Bulletin//Lito Hilidon/Bannawag)
