Sisasagana ni dati a senador Antonio "Sonny" Trillanes IV a sumango iti panagimbestigar ti Senado mainaig iti naipadamag nga isuna ti pinusgan ti gobierno a mangiwayat iti welfare check ni dati a presidente Rodrigo Duterte iti International Criminal Court (ICC) iti the Netherlands.
Gapu daytoy iti impila ni Sen. Robinhood Padilla a resolusion a nangbilin iti maseknan a komite ti Senado nga imbestigarenda dagiti damag a ni Trillanes ti pinusgan ti Marcos administration a mangkita iti kasasaad ni Duterte iti detention facility iti The Hague.
Dinakamat ti resolusion ti kinuna ni Bise Presidente Sara Duterte idi Septiembre 24 a nangipeksa iti panagamakna iti maipagarup a "welfare check" a naisayangkat nga awan pammalubos wenno panangyumanda iti pamilia ni Dutete wenno iti abogadona.
Segun ken ni Duterte, nagpammarang laeng ti tignayda a kas annongen ti konsulado ken saan a nasayaat ti panggepda, ta maidanon ti report iti Malakanyang.
Mapukpukaw a nobia, nasarakan iti Pangasinan
Iti resolusion ni Padilla, kunana a ti maipagarup a pannakadutok ni Trillanes kas mangibagi iti estado iti international court ket mangpataud kadagiti saludsod maipanggep iti legalidad, konstitusionalidad, ken propriedad. Innayonna a masapul nga ammuen iti imbestigasion no agpayso nga adda impaay ti gobierno wenno ti ahensia ti gobierno nga autoridad ken ni Trillanes.
"Mayatak iti dayta. Ngem nalaklaka no ni Digong laengen ti saludsodenda no sinarungkarak isuna wenno saan. Idinto a mabalin met a kasarita ni Sara ti amana uray ania nga oras," kuna ni Trillanes.
Saan pay a nangikeddeng iti hearing ti maseknan a komite mainaig iti resolusion ni Padilla. (Dhel Nazario/Manila Bulletin//Lito Hilidon/Bannawag)
