Tapno mapapardas ti pannakaallangon kadagiti biktima dagiti kallabes a didigra iti pagilian, inruar ti Department of Budget and Management (DBM) itay Oktubre 3 ti agdagup ti ₱1.6 a bilion para iti calamity fund dagiti ahensia ti gobierno.
Mausar daytoy a gatad a sukat ti quick response funds (QRF) ti Department of Public Works and Highways (DPWH) ken ti Department of Social Welfare and Development (DSWD).
Naipaay ti ₱1 a bilion iti DPWH tapno masukatan ti QRF-da, a namitlo a kiniddawda a masukatan; idinto a ₱625 a milion ti naipaay iti QRF ti DSWD para iti 2025 tapno usarenda tapno mapunnuan ti lebben ti DSWD a relief goods ken tulong pinansial para kadagiti pamilia nga inapektaran ti didigra.
Ti QRF ti nakalebben a pondo para iti emerhensia tapno usaren iti panangipaay iti tulong, tapno napardas ti pannakaallangon dagiti komunidad a naapektaran ti didigra kas iti gingined ken bagyo.
Mapukpukaw a nobia, nasarakan iti Pangasinan
Adda QRF dagiti ahensia ti gobierno kas iti DSWD, DPWH, ken ti Office of Civil Defense (OCD) a mabalinda nga usaren tapno tulunganda dagiti naapektaran a komunidad. Mabalin nga agkiddaw dagiti ahensia ti gobierno no nababbaban ngem iti 50 a porsiento ti natda a pondo ti QRF-da.
Adda met QRF ti Health (DOH), Department of the Interior and Local Government (DILG), Department of Education (DepEd), Department of Transportation–Philippine Coast Guard (DOTr–PCG), National Irrigation Administration (NIA), ken ti Department of Agriculture (DA). (Derco Rosal/Manila Bulletin//Lito Hilidon/Bannawag)
