Kabayatan ti panangberipikar ti Office of Civil Defense (OCD) itay Oktubre 3, nagbalin laengen nga 68 ti kompirmado a bilang dagiti natay gapu iti magnitude 6.9 a ginggined a nangdayyeg iti Cebu idi Septiembre 30.
Nabaliwan ti damo a report nga addan 72 a natay, ta segun iti report ti National Disaster Risk Reduction and Management Council (NDRRMC), uppat ti naikissay iti dagup a bilangda itay 6:00 ti agsapa.
Kuna ni OCD deputy spokesperson Diego Agustin Mariano a resulta daytoy ti balidasion nga insayangkat ti Management of the Dead and Missing (MDM) Cluster nga idadauluan ti Department of the Interior and Local Government (DILG).
Maibasar iti proseso ti MDM, dagiti nai-report a natay, agdalan iti umno a pannakailasin ken dokumentasion, a pakairamanan iti pannnakaaramid ti death certificate, tapno maammuan no ti didigra ti mismo a makagapu iti pannakatayda.
Senado, pinasingkedanna ti ₱6.793-trilion a nailian a badiet para 2026
Ti report a 72, naggapu iti Provincial Disaster Risk Reduction and Management Office (PDRRMO) ti Cebu, idinto a ti kompirmado a bilang ket naggapu iti MDM, a kadagitoy laeng a nagbalin nga aktibo.
Inlawalawag ni Mariano nga adda met kastoy a pasamak iti napalpalabas, a makissayan ti bilang dagiti natay gapu iti pannakaulit ti nagan dagiti natay iti panangbilang dagiti opisial ti local disaster council, wenno dagiti naisurat a natay ket natakuatan a sibibiag met gayam idi agangay, kas iti kaso ti Bagyo Nando.
Iti sabali a bangir, mapanen a 80,595 a pamilia wenno 366,360 a tattao ti naapektaran ti ginggined kadagiti 106 a barangay iti Central Visayas (Region 7).
Agdagup iti 1,795 dagiti adda iti walo nga evacuation center, idinto a 75,227 ti matmaturog pay laeng iti ruar dagiti balayda gapu ti amakda kadagiti agsasaruno nga aftershock. (Martin Sadongdong/Manila Bulletin//Lito Hilidon/Bannawag)
