Rimmuaren ni Severe Tropical Storm Paolo iti Philippine Area of Responsibility (PAR) itay agsapa, Oktubre 4, ngem agtultuloy latta ti napigsa nga angin, nadawel nga allon ti baybay,ken posible a panaglayus kadagiti lugar nga asideg iti baybay kadagiti dadduma a paset ti Luzon, segun iti Philippine Atmospheric, Geophysical and Astronomical Services Administration (PAGASA).
Itay 5:00 iti parbangon, nasaripatpatan ti PAGASA ti sentro ni Paolo iti 295 a kilometro iti laud ti Sinait, Ilocos Sur.
Agpigsa ni Paolo iti 110 a kilometro kada oras iti asideg ti sentrona, ken pugso nga agingga iti 135 a kilometro kada oras. Agpalaud amianan a laud iti kapardas a 20 a kilometro kada oras nga agturong iti abagatan ti China ket ekspektarenda nga agbalin manen a kategoria a "typhoon" iti West Philippine Sea.
Naipakat latta ti Tropical Cyclone Wind Signal (TCWS) No. 1 iti laud a paset ti Abra (Danglas, Bangued, Langiden, San Quintin, Pidigan, San Isidro, Pilar, Villaviciosa, Peñarrubia, Manabo, Luba, Tayum, La Paz, Lagayan, Tubo, Bucay, Dolores, San Juan, Lagangilang), ti laud a paset ti Benguet (Bakun, Kibungan, Kapangan, Sablan, Tuba, Mankayan, Tublay, La Trinidad, Baguio City). ti abagatan a paset ti Ilocos Norte (Nueva Era, Banna, Badoc, Pinili, City of Batac, Paoay, Marcos, Currimao), Ilocos Sur, La Union, ti laud ken sentro a paset ti Pangasinan (Bolinao, Bani, Agno, Burgos, Dasol, Mabini, Infanta, Bugallon, Labrador, Sual, City of Alaminos, Lingayen, Aguilar, Mangatarem, Urbiztondo, San Carlos City, Binmaley, Dagupan City, Calasiao, Basista, Bayambang, San Fabian, San Jacinto, Mangaldan, Mapandan, Santa Barbara, Malasiqui, Alcala, Bautista, Santo Tomas, Villasis, City of Urdaneta, Manaoag, Laoac, Pozorrubio, Sison), ken ti amianan a paset ti Zambales (Iba, Candelaria, Palauig, Santa Cruz, Masinloc).
Kasapulan ti natibker ken nainkalintegan a pagtaktakderan iti parikut iti WPS --NMC
Nupay awanen ni Paolo it Filipinas, impaganetget ti PAGASA a makarikna latta ti Northern ken Central Luzon iti napeggad a kasasaad ti panawen iti sumaruno a 24 nga oras.
Pinakdaaran ti PAGASA dagiti naapektaran a lugar nga agtalinaedda a naridam, gapu iti kellaat a panaglayus, panagreggaay ti daga ken panagdakkel ti danum ti baybay. (Merlina Hernando-Malipot/Manila Bulletin//Lito Hilidon/Bannawag)
