Raemen ti Malakanyang ti panagkedked ni Bise Presidente Sara Duterte a dumar-ay iti plenario ti Kamara para iti singasing a badiet ti Office of the Vice President (OVP) iti 2026.
Segun ken ni Undersecretary ti Presidential Communications Office (PCO) Claire Castro idi Oktubre 3, saan a lapdan ti Malakanyang ti desision ni Duterte, ngem inyunay-unayna a pagrebbengan ti OVP nga idepensa ti badietna.
Itay Huebes, Oktubre 2, awan manen ti dimmar-ay nga opisial ti OVP iti plenary debate ti Kamara iti singasing a badiet ti OVP a ₱902.9 a milion.
Inadmitir ni Palawan Second District Rep. Jose Alvarez, nga isponsor ti badiet ti OVP iti 2026 General Appropriations Bill (GAB), a maymaysana a mangidepensa iti badiet ti OVP.
Senado, pinasingkedanna ti ₱6.793-trilion a nailian a badiet para 2026
Impresentar ni Alvarez ti tallo a surat ni Duterte, agraman ti maysa a napusgan kas Assistant Secretary Lemuel Ortonio a dumar-ay iti biang ni Duterte. Ti maikatlo a surat ket naglaon kadagiti kondision ti bise presidente sakbay a dumar-ay daytoy iti Kamara, ket maysa kadagiti kondisionna ti idadar-ay met ti presidente tapno idepensana ti singasing a badiet ti Office of the President a ₱27.3 a bilion.
Maysa pay a kondision ni Duterte ti pannakawaswas ti immigration lookout bulletin order (ILBO) maibusor kadagiti pito nga empleadona a pakairamanan da Lopez ken Ortonio.
Namin-adun a naitantan ti pannakakataming ti badiet ti OVP gapu iti saan nga idadar-ay ti undersecretary-level official, maibasar iti paglintegan ti Kamara. (Argyll Cyrus Geducos/Manila Bulletin//Lito Hilidon/Bannawag)
