Indagadag manen ti Philippine Business for Education (PBEd) iti gobierno a mangipatungpal iti nadaras a pannakarepormar ti Board Licensure Examination for Professional Teachers (BLEPT), tapno masigurado a dagiti laeng sisasagana ken kualipikado a mannursuro ti makastrek kadagiti pagadalan.
Kuna ni PBEd Executive Director Bal Camua a saan a marisut ti krisis ti panagadal no saan a masigurado a nasaririt, naanus, ken sisasagana ti mannursuro iti tunggal siled pagadalan.
Inyunay-unay ti PBEd a no saan a marepormar ti BLEPT, saan nga agballigi dagiti maisaysayangkat a programa a mangpasayaat iti sistema ti edukasion iti pagilian.
Maibasar iti sukisok a “Fixing the Foundations: Strengthening the Teaching Workforce through the BLEPT” nga impresentar ti Second Congressional Commission on Education (EDCOM II), nadakamat dagiti kangrunaan a parikut iti agdama a sistema ti teacher licensure exam:
Retirado a heneral, nakemmeg gapu iti panangsugsog a mangtippuog iti gobierno
* Saan a panagtutunos ti BLEPT, ti teacher education curriculum, ken ti Philippine Professional Standards for Teachers (PPST);
* Nakedngan a bilang dagiti kualipikado a mangisurat ken mangrepaso, a pagkamengan laeng ti tallo a board member a mangisagana kadagiti test question para iti kadagiti eight-degree programs ken nadumaduma nga specialization; ken
* Nakurang a pilot testing ken sistematiko a panangtingiting kadagiti item, a mangparnuay iti panagduadua iti kinapatas ken kinabalido ti eksaminasion.
Dinagadag ti PBEd ti Professional Regulation Commission (PRC), Commission on Higher Education (CHED), Teacher Education Council (TEC), ken Department of Education (DepEd) nga agtitinnulongda koma a mangrepormar iti pannakaiwardas ken pannakatarimaan iti proseso ti BLEPT.
Innayonda a kasapulan dagiti agngayangay a mannursuro ti eksaminasion a mangipakita iti anag ti epektibo a panangisuro -- ken kalintegan dagiti Filipino nga estudiante a maaddaan iti mannursuro a nasaririt, naanus, ken sisasagana a mangipaay iti dekalidad a panagisuro. (Merlina Hernando-Malipot/Manila bulletin//Lito Hilidon/Bannawag)
