Kinompirmar ni Commission on Elections (Comelec) Chairman George Erwin Garcia ita nga aldaw, Oktubre 7, nga im-imbestigarenda met dagiti donasion nga inted dagiti kontraktor kadagiti nagkandidato a presidente ken bise presidente idi 2022.
Iti maysa nga interbiu, kinuna ni Garcia a paset dagitoy iti panangimbestigar ti Comelec kadagiti 55 a contractor a nangidonar kadagiti kandidato idi Mayo 2022.
Segun ken ni Garcia, mangal-alada pay laeng iti pammatalged manipud iti Department of Public Works and Highways (DPWH) tapno makitada no adda naala dagitoy a kontrata iti gobierno idi sakbay ti panangipilada iti kandidaturada, idi panawen ti panangipila iti kandidatura, wenno kalpasan ti panagpipila iti kandidatura -- uray nangabak pay ti kandidato.
Kuna ni Garcia a masapul a mapaneknekanda nga umuna a public works contractor dagiti nangidonar kadagiti politiko, ta awanen ti rumbeng a pagsasaritaan no private contractor dagitoy.
Senado, pinasingkedanna ti ₱6.793-trilion a nailian a badiet para 2026
Maibasar iti Section 95(c) ti Omnibus Election Code, maiparit dagiti direkta wenno saan a direkta a kontribusion para iti partisano nga aktibidad ti politika babaen dagiti natural ken huridikal nga entidad nga addaan kadagiti kontrata wenno sub-kontrata a mangsuplay iti gobierno wenno ania man kadagiti dibision, subdibision, wenno instrumentalidadna, kadagiti tagilako wenno serbisio wenno mangaramid iti konstruksion, wenno dadduma pay a trabaho.
Nadakamat ti nagan da Presidente Marcos Jr. ken Bise Presidente Sara Duterte, nga agpada a kandidato idi 2022 elections, iti maysa a report ti PCIJ a nakaawat iti minilion a pisos a donasion manipud kadagiti contractor. Kuna ti report a nakaawat ni Marcos iti ₱20 a milion manipud iti Rudhil Construction & Enterprises Inc., ken P1 a milion manipud iti Quirante Construction Corporation.
Nakaawat ni Duterte iti donasion manipud iti Genesis88 Construction Inc., idinto a ti Esdevco Realty Corporation ti nagbayad kadagiti advertisement ni Duterte nga agbalor iti ₱19.9 a milion.
Segun ken ni Garcia, masapul a kompirmarenda nga umuna dagitoy iti DPWH, ta adda parikut ti Comelec kadakuada, nangruna iti dadduma a nagan dagiti contractor a dinakamat ti PCIJ, a naiduma kadagiti nagan a naala ti Comelec.
Innayon ni Garcia a masapul a risutenda no adda pagdumaan ti nangidonar a personal wenno kas pribado a tao ken iti nangidonar a kas maysa nga agtagikua iti construction corporation. (Dhel Nazario/Manila Bulletin//Lito Hilidon/Bannawag)
