Imbestigaren ti provincial government ti Cagayan ti narpuog a Piggatan Bridge ti Maharllika Highway iti ili ti Alcala, Cagayan itay Oktubre 6.
Insayangkat ni Gob. Edgar Aglipay, kaduana ni Alcala Mayor Tin Antonio, ti inspeksion iti dinekadan ti tawenna a rangtay idiy rabii ti Lunes, Oktubre 6, ket nagsasaritaanda no ania ti ipakatda a rerouting plan.
Kinuyog ida da Department of Public Works and Highways (DPWH) -Region 2 Assistant Regional Director Rona Ubinia, DPWH 1st District Engineer Oscar Gumiran, ken ni Cagayan provincial police chief Police Col. Mardito Anguluan.
Segun ken ni Antonio, 45 a tawenen ti rangtay, ket daytoy ti kadadaanan a rangtay iti Alcala ken agpatingga laeng iti 18 a tonelada ti kabaelanna a kadagsen ti lumasat a behikulo.
Senado, pinasingkedanna ti ₱6.793-trilion a nailian a badiet para 2026
Kayatda nga ammuen no dagiti limmabas nga uppat a trak, a nadadagsen ti kargada, ti pudno a makagapu iti pannakarpuog ti rangtay.
Segun iti report, produkto nga agrikultura ti karga ti dua kadagiti trak.
Inkari ti DPWH-Cagayan 1st Engineering District a papardasenda ti pannakatarimaan ti rangtay ken makikoordinarda kadagiti opisial ti lokal ken probinsial a gobierno no ania ti kasayaatan nga aramidenda. (Tristan Lozano/Manila Bulletin//Lito Hilidon/Bannawag)
