Nabayagen nga ammo ni Presidente Ferdinand R. Marcos Jr. dagiti report mainaig iti gandat dagiti sumagmamano a grupo a mangisayangkat iti kudeta wenno panangrabsut iti turay, ngem saan a nagdanag ti Malakanyang ta agtalek iti kinatudio ti Armed Forces of the Philippines (AFP) ken ti Philippine National Police (PNP).
Segun ken ni Undersecretary ti Presidential Communications Office (PCO) Claire Castro, napakaammuanen ti presidente maipanggep iti gandat dagiti babassit a grupo nga agkudeta sakbay pay ti nasaknap a panagrali idi Septiembre 21.
Itay kallabes, kinompirmar ni AFP chief of staff Romeo Brawner Jr. nga immasideg kenkuana ti grupo dagiti walo a retirado a heneral ken koronel idi Septiembre 20 a nangallukoy kenkuana nga agtignay a maibusor iti kinaruker ti gobierno ken ikkatennan ti suportana ken ni Marcos tapno patugawenda ni Bise Presidente Sara Duterte a ks presidente.
Ngem kuna ni Brawner a sinupiatna daydi a kapanunotan, ket impaganetgetna nga agtalinaed ti AFP a napudno iti Konstitusion ken iti chain of command.
Mapukpukaw a nobia, nasarakan iti Pangasinan
Naangay ti nasao a pannakataripnong dagiti agpanggep nga agkudeta ken ni Brawner iti Camp Aguinaldo iti karabyan dagiti maar-aramid a rali kontra kadagiti naanomalia a flood control project.
Kuna ni Castro nga ad-adalen dagiti autoridad no dagiti nadakamat a panagtignay ket maibilang a sedition wenno treason, tapno maipila dagiti maitutop a kaso. (Darryl John Esguerra/PNA//Lito Hilidon/Bannawag)
