Pormal nga indatag ni Senate President Pro Tempore Panfilo “Ping” Lacson idi Lunes, Oktubre 6, ti panaglusulosna a kas chairman ti Blue Ribbon Committee (BRC) ti Senado.
Iti suratna ken ni Senate President Vicente “Tito” Sotto III, impakaammo ni Lacson ti desisionna nga aglusulos kas chairman ti Committee on Accountability of Public Officers and Investigations, a nalatak iti awagna a "Blue Ribbon Committee."
Ti panangsupsupiat dagiti kakaduana iti komite iti panagimbestigarda kadagiti naanomalia a flood control project ti dinakamat ni Lacson a makagapu iti panaglusulosna.
Segun ken ni Lacson, saan a nagustuan dagiti kakaduana iti komite ti turongen ti panagimbestigarda gapu ta nairamanen dagiti dadduma a padada a senador kadagiti naanomalia a flood control project.
Marcos, Robredo, nagsarak iti Naga city
Kuna ni Lacson a saan a pudno ti ibagbaga dagiti sumagmamano a senador a dagiti laeng padana a senador ti im-imbestigarenna ket kalkallubanna dagiti kameng ti Kamara a mapapati a kangrunaan a nakabasol iti anomalia dagiti flood control project.
Inlawlawag ni Lacson a surotenda no sadino ti pangiturongan dagiti ebidensia kadakuada, saan a babaen ti kinaringgor ken politikal a kapanunotan.
Kuna ni Lacson nga agpapaay isuna a kas daulo ti komite gapu iti panagtalek kenkuana dagiti kakaduana a senador. (Hannah L. Torregoza/Manila Bulletin//Lito Hilidon/Bannawag)
