Nagkiddaw ti Independent Commission for Infrastructure (ICI) iti Department of Justice (DOJ) a mangipaulogda koma iti Immigration Lookout Bulletin Order (ILBO wenno panangsiput iti mabalin a panagbiahe a gandatna ti pumanaw iti pagilian) kontra kada Leyte 1st district Rep. Martin Romualdez, Senador Chiz Escudero, dati a senador Bong Revilla, Senador Jinggoy Estrada, ken 28 pay a tattao, mainaig iti im-imbestigarenda nga anomalia kadagiti flood control project.

Kadagiti 28 a nairaman, 15 ti kongresman.

Nangipatulod ni ICI Chairman retired Supreme Court (SC) Justice Andres Reyes Jr. iti surat ken ni DOJ Secretary Crispin Remulla ita nga aldaw, Oktubre 8, tapnpo kiddawenda ti nadaras a pannakaipaay ti ILBO iti 32 a tattao.

Nairaman iti kidkiddawen ti ICI nga ILBO da dati a senador ken agdama a Mayor ti Makati City Nancy Binay ken dagiti kameng ti staff-na, Carlene Yap, Commission on Audit (COA) Commissioner Mario Lipana ken ti asawana a ni Marilou Laurio-Lipana, Department of Education (DepEd) Undersecretary Trygve Olaivar, ken ti special envoy ti Filipinas iti China for Trade ken negosiante a ni Maynard Ngu.

Nasional

Mapukpukaw a nobia, nasarakan iti Pangasinan

Nairaman pay dagiti agdama a kongresman a da Roman Romulo (Pasig), Jojo Ang (Uswag Ilonggo Party-list), PM Vargas (Quezon City 5th District), Arjo Atayde (Quezon City 1st district), Nikki Briones (AGAP Party-list), Marcy Teodoro (Marikina 1st district), Rida Robes (San Jose del Monte iti Bulacan), Eleandro Jesus Madrona (Romblon), Benjie Agarao (Laguna 4th district), Odie Tarriela (Occidental Mindoro), Reynan Arrogancia (Quezon 3rd district), Antonieta Eudela (Zamboanga Sibugay 2nd district), Dean Asistio (Caloocan 3rd district), ken ni Marivic Co-Pilar (Quezon City 6th district).

Adda met iti listaan ti ICI da dati a kongresman Bem Noel (An Waray Party-list), Marvin Rillo (Quezon City 4th district), ken ni Teodorico Haresco (Aklan 2nd district).

Nairaman pay da Loida Busa ken Johnny Protesta Jr. a DPWH District Engineer ti Quezon City 2nd district, Ramon Devanadera ti Cebu City, Arturo Gonzales Jr. ti Quezon City, ken ti katulongan ni Rillo a ni Bogs Magalong.

Kiniddaw met ni Reyes iti Bureau of Immigration (BI), nga adda iti babaen ti DOJ, a pakaammuanda dagiti kameng ti ICI ken dagiti pannakabagi ti linteg iti ania man a panggep a panagbiahe dagiti nadakamat a tao. (Joseph Pedrajas/Manila Bulletin//Lito Hilidon/Bannawag)