Mangrugi nga agakem ni Sekretario ti Department of Justice (DOJ) Jesus Crispin C. Remulla a kas Ombudsman inton Oktubre 10, kalpasan ti panangdutok kenkuana ni Presidente Marcos Jr. idi kalman, Oktubre 7.
Apaman a tumugaw ni Remulla iti takemna kas Ombudsman, ni Undersecretary Fredderick A. Vida ti agpaay a kas officer-in-charge (OIC) wenno acting secretary ti DOJ.
Ni Vida ti agdama nga undersecretary in-charge of finance, administrative services, and personnel cluster ti DOJ.
Segun ken ni Remulla, kayatna a kitaen no kasano a maiwarwardas ti Office of the Ombudsman, ken ti kaadu ti kaso nga iggem ti ahensia, kasta met ti Sandiganbayan, tapno maamirisna no kasano ti rumbeng a panaggarawna.
Senado, pinasingkedanna ti ₱6.793-trilion a nailian a badiet para 2026
Maipanggep iti ibagbaga dagiti kritikona nga usarenna laeng ti akemna a kas Ombudsman a mangilupit iti pamilia ni dati a Presidente Rodrigo Duterte ken dagiti kaaliadona, kuna ni Remulla a saan a mapasamak daytoy.
Kas maysa nga Ombudsman, impasigurado ni Remulla nga ipatungpalna ti transparensia ken adu a gapuanan, ken papardasenna ti pannakarisut dagiti kaso ken ipatungpalna ti pannakausig dagiti addaan iti kaso.
Segun ken ni Remulla, napaliiwna nga adu dagiti maar-aramid a taktika a mangtaktak (delaying tactic) tapo ma-dismiss dagiti kaso maigapu iti saan a pannakaipaay iti kalinteganda iti napardas a pannakausig.
Iti ipapanawna iti DOJ, kuna ni Remmulla a dakkel ti panagtalekna kadagiti mabati isu nga awan pagdanaganna iti mapanawanna nga ahensia. (Jeffrey Damicog/Manila Bulletin//Lito Hilidon/Bannawag)
