Nagsapatan ti kaddutok nga Ombudsman a ni Jesus Crispin C. Remulla iti sango ni Acting Chief Justice Marvic M.V.F. Leonen iti session hall ti Korte Suprema iti Manila ita nga aldaw, Oktubre 9.
Mangrugi nga agakem ni Remulla inton Oktubre 10.
Dinutokan ni Presidente Marcos Jr. ni Remulla, dati a daulo ti Department of Justice (DOJ), idi Oktubre 7 manipud kadagiti pito a kandidato nga innominar ti Judicial and Bar Council (JBC). Agpaut iti pito a tawen ti termino ti Ombudsman.
Agpaay nga officer-in-charge ti DOJ ni Undersecretary Fredderick A. Vida a daulo ti departamento ti Finance, Administrative Service, and Personnel Cluster ti DOJ.
Mapukpukaw a nobia, nasarakan iti Pangasinan
Iti maysa nga interbiu kalpasan ti pannakadutokna a kas Ombudsman, inkari ni Remulla a kutkotenna dagiti anomalia kadagiti flood control project, ket prioridadna dagiti reklamo nga indatag ti Independent Commission on Infrastructure (ICI), ti Department of Public Works and Highways (DPWH), ken ti National Bureau of Investigation (NBI).
Siam a fraud audit report ti naidatagen iti Commission on Audit (COA) mainaig kadagiti ghost flood-control project iti Bulacan.
Malaksid iti report ti COA, kaso a graft ken malversation of funds ti kaso nga impila ni DPWH Secretary Vince Dizon a maibusor kadagiti sumagmamano nga opisial ti Bulacan 1st District Engineering Office (DEO) ken pribado a kontraktor mainaig kadagiti ghost ken substandard a flood-control project. (Rey G. Panaligan/Manila Bulletin//Lito Hilidon//Bannawag)
