Saan nga anamongan ti Office of Public Counsel for Victims (OPCV) ti International Criminal Court (ICC) ti kiddaw ni dati a presidente Rodrigo Duterte nga “indefinite adjournment” kadagiti kaso a naipila kontra kenkuana, ngem indagadag ketdi ti OVPC a matingiting ti kasasaad ti salun-at ni Duterte tapno mapatalgedan no kabaelanna ti sumango iti pannakausig ti kasona.
Iti 14 a panid a dokumento nga indatag ni OPCV Principal Counsel Paolina Massidda itay Oktubre 8, kinunana a ti ibagbaga dagiti abogado ni Duterte mainaig iti salun-at daytoy ket saan a mabalin a pagibasaran iti pannakaisardeng ti legal a proseso kontra kenkuana.
Anamonganna ketdi a masapul ti naan-anay ken napardas a panangtingiting ti ICC iti salun-at ni Duterte tapno maliklikan ti pannakaitantan ti panagtulid ti proseso, ken insingasingna a mangdutokti ICC kadagiti independent expert a mangkita iti kasasaad ti suspek no kabaelan daytoy ti makipartisipar kadagiti sumaruno a paset ti proseso ti ICC.
Innayon ti OPCV a masapul a maaramat amin a pamuspusan sakbay a desisionan ti ICC no isardengda pay laeng ti pannakausig ni Duterte, ta saan laeng a ti depensa ti addaan iti interes iti daytoy, no di pay ket dagiti biktima ken ti internasional a komunidad.
Retirado a heneral, nakemmeg gapu iti panangsugsog a mangtippuog iti gobierno
Kuna ti OPCV a saan laeng a ti biktima ti addan iti kalintegan iti patas ken napardas a pannakarisut ti kaso, no di ket pay dagiti biktima ti krimen. (Raymund Antonio/Manila Bulletin//Lito Hilidon/Bannawag)
