Kinissayan ti Kamara ti singasing a badiet ti Office of the Vice President (OVP) para iti 2026 iti P156 a milion, isu a naisubli ti gatad ti badiet ti OVP a kas iti 2025.
Pormal nga inaprobaran dagiti kameng ti Kamara iti plenario itay Oktubre 10, bayat a naaramid ti individual ammendments iti P6.793 a trilion a General Appropriations Bill (GAB) wenno ti singasing a 2026 national budget.
Inmosion ni Mamamayang Liberal (ML) Party-list Rep. Leila de Lima a maksayan iti P156 a milion ti pondo ti OVP, isu manipud iti P889.24 a milion, nagbalinen a P733.2 a milion a maipada iti gatadna idi 2025.
Maigapu daytoy iti saan nga idadar-ay ni Bise Presidente Sara Duterte iti Kamara, nga ibilang ni De Lima a pananglais iti institusion, ken kinatangsit ti bise presidente.
Senado, pinasingkedanna ti ₱6.793-trilion a nailian a badiet para 2026
Innayon ni De Lima a masapul a madisiplinaan ti bise presidente.
Inanamongan ni House Committee on Appropriations Chairperson Nueva Ecija 1st district Rep. Mikaela Angela Suansing ti mosion ni De Lima. Sinuportaran met ni Majority Leader Ilocos Norte 1st district Rep. Sandro Marcos ti panangawat ni Suansing iti mosion ni De Lima, isu a naaprobaran daytoy. (Ellson Quismorio/Manila Bulletin//Lito Hilidon/Bannawag)
