Dagiti sinasao ni Bise Presidente Sara Duterte maipanggep iti gandatna panangilibas iti amana manipud iti detention facility ti maysa kadagiti dinakamat ti pre-trial chamber ti International Criminal Court (ICC) a rason a dida pinatgan ti interim release a kiniddaw ni dati a Presidente Rodrigo Duterte.
Iti 23 a panid a desision ti Pre-Trial Chamber 1 (PTC 1) itay Oktubre 10, nagkaykaysa ti pangngeddeng dagiti hues a da Iulia Antoanella Motoc, Reine Adélaïde Sophie Alapini-Gansou, ken María del Socorro Flores Liera a saanda nga anamongan ti immuna a kiddaw, kasta met ti renewed request para iti interim release, ken imbilinda ti agtultuloy a pannakaidetine ti dati a presidente.
Dinakamat ti PTC 1 ti dua a pasamak nga idiay, sinao ni Sara Duterte idi Hulio 19, 2025 nga ilibasna ti amana manipud iti detention facility kasta met ti imbagana nga agawiddan iti Davao City no bilang mapatgan ti interim release ti amana.
Maysa a dinakamat ti PTC 1 ti imbaga ni Sara Duterte a nga ilegal ti panangala ti ICC iti amana, a paglabanenna ti ICC ken ti korte ti Filipinas, kasta met ti panangusarda iti palso a saksi.
Kasapulan ti natibker ken nainkalintegan a pagtaktakderan iti parikut iti WPS --NMC
Kuna ti PTC 1 nga idi Agosto 19, 2025 imbaga ni Sara Duterte a kayat ti amana nga agsublin iti Davao City, no bilang mapatgan ti interim release daytoy, banag a kasungani iti ibagbaga ti abogadona nga agtalinaed daytoy iti pagilian a mangawat kenkuana.
Iti sabali a bangir, kinuna ti abogado ni Duterte a ni Nicholas Kaufman a biddut ti pangngeddeng ti PTC 1 ket nangipilan iti apelada idi napan a lawas. (Raymund Antonio/Manila Bulletin//Lito Hilidon/ Bannawag)
