Nagbalinen a linteg ti gakat a mangipaay iti libre a serbisio ti puneraria kadagiti marigrigat a Filipino, segun iti Malakanyang, ita nga aldaw, Oktubre 13.
Kinompirmar ni Undersecretary ti Presidential Communications Office (PCO) Claire Castro a nagbalinen a linteg ti Republic Act (RA) 12309 wenno ti Free Funeral Services Act kalpasan a saan a pinirmaan ni Presidente Marcos daytoy.
Maibasar iti Article VI, Section 27(1) ti 1987 Constitution, agbalin a linteg ti maysa a gakat (bill) no saan a garawen ti Presidente daytoy iti las-ud ti 30 nga aldaw kalpasan a naipatulod ti Kongreso.
Kuna ni Castro a saan pay a naipablaak ti RA 12309, ngem nagbalinen a linteg daytoy idi Septiembre 28 no ibasar iti rekord ti Senado.
Mapukpukaw a nobia, nasarakan iti Pangasinan
Segun iti baro a linteg, ibaklay ti gobierno dagiti magasto iti puneraria dagiti pamilia a maibilang a nakurapay wenno adda iti pakarigatan, agraman dagiti inapektaran ti didigra wenno emerhensia, kas inkeddeng ti Department of Social Welfare and Development (DSWD).
Amin nga accredited a puneraria iti entero a pagilian, ket masapul a mangipaay iti estandarte nga “indigent funeral package,” a pakairamanan ti balsamo, lungon, wenno pangikkan iti dapo (urn), panangibiahe iti bangkay, ken dadduma pay a kangrunaan a serbisio para iti natay.
Ti DSWD ti mangbayad kadagiti puneraria segun iti kontrata a pinirmaanda ken iti benipisiario.
Tapno makaala iti benepisio, masapul a mangiparang iti pamilia ti balido nga ID, death certificate, ken kontrata iti serbisio ti puneraria a pinirmaanda ken iti kameng ti DSWD, agraman ti social case study nga inaramid ti linsensiado a social worker.
Aggapu ti pondo daytoy iti badiet ti Assistance to Individuals in Crisis Situations (AICS) ti DSWD, ken addanton mailatang a pondona inton sumaruno a pannakabukel ti national budget. (Darryl John Esguerra/PNA//Lito Hilidon//Bannawag)
