Saan a pinatgan ti Korte Suprema (SC) ti kiddaw ti Duterte Youth party-list a pannakaipaulog ti temporary restraining order (TRO) a maibusor iti pangngeddeng ti Commission on Election (Comelec) a nangwaswas iti rehistrasionda kas party-list.
Iti resolusion a naipaulog idi Septiembre 30, saan a pinatgan ti SC en banc ti kiddaw ti grupo a TRO, writ of preliminary injunction, ken status quo ante order, agraman ti mosionda para iti special raffle.
Binilin ti SC ti Comelec ken ti Duterte Youth a mangtedda iti komento iti las-ud ti sangapulo nga aldaw.
Kinuestionar ti Duterte Youth dagiti dua a resolusion ti Comelec: ti resolusion idi Hunio 18 a nangkanselar iti rehistrasionda; ken ti resolusion ti Comelec idi Agosto 29 a nangpasingked iti immuna a pangngeddengda ken nangwaswas iti motion for registration nga impila ti Duterte Youth.
Marcos, Robredo, nagsarak iti Naga city
Winaswas ti Comelec ti rehistrasion ti grupo maibatay iti petision idi 2019 a nangkuestionar iti kinabalido ti rehistrasion ti party-list idi 2018.
Segun kadagiti nagpetision, saan a naipablaak ti aplikasion ti Duterte Youth nga agbalin a party-list iti dua a pagiwarnak, ken awan ti naangay a hearing para iti panagrehistroda kas maitunos iti Party-list System Act. (Benjamin Pulta/PNA//Lito Hilidon/Bannawag)
