Dimmar-ay ni Cavite 4th district Rep. Francisco "Kiko" Barzaga iti inyawisna a rali kontra iti administrasion ni Marcos a naangay iti Forbes Park Village iti Siudad ti Makati idi rabii ti Domingo, Oktubre 12.
Bassit laengen ti oras ti pannaturog ni Barzaga gapu ta masapul a dar-ayanna ti naituding a hearing ti House Committee on Ethics and Privilege ita nga aldaw, Oktubre 13, tapno kitaenda no rumbeng a madusa daytoy gapu kadagiti ar-aramidenna.
Tamingen ti Ethics Committee ti Kamara ti reklamo nga "unethical conduct" a nangsalungasing iti Article 142 ti Revised Penal Code, wenno inciting to sedition a maibusor ken ni Barzaga.
Ni Barzaga--a nangnagan iti bagina a kas "congressmeow" (gapu kano ta naayat iti pusa) ken nangibilang iti bagina a kalaban ti panagkunniber--ket simmangpet iti Buendia gate ti Forbes Park idi 11:30 iti rabii ti Oktubre 12.
Senado, pinasingkedanna ti ₱6.793-trilion a nailian a badiet para 2026
Ngem inaklon ni Barzaga a natawtaw iti dalan idi napan iti Forbes Park, ta Dasmariñas Village met gayam ti napananna. Nagtalinaed ni Barzaga iti Dasmariñas Village a naki-selfie kadagiti tao sadiay, nagpainterbiu, ken nagpayapay kadagiti agbuybuya iti las-ud ti sumagmamano a minuto sakbay a nagturong iti Forbes Park.
Apaman a makasangpet iti Forbes Park, indirdir-i dagiti agrarali ti nagan ni Barzaga ken ti "Marcos resign!" Nagkitada sadiay ken ni Jimmy Bondoc, abogado a supporter dagiti Duterte, ken inaramidna ti kas iti inaramidna (nagpainterbiu, naki-selfie kadagiti agrukbab kenkuana) iti Dasmariñas Village sa pimmanawen kalpasan ti 30 a minuto ket nabati dagiti supporter-na.
Segun ken ni Bondoc, nalabes ti pannakaallukoy ni Barzaga iti panagalsa dagiti GenZ iti Nepal a nangitunda iti pannakarippuog ti gobierno sadiay.
Sakbay a napan iti Forbes Park,, napan ni Barzaga iti maysa a rali iti Rajah Sulayman Park iti Malate, Manila. (Ellson Quismorio/Manila Bulletin//Lito Hilidon/Bannawag)
