Maysa a low-pressure area (LPA) ti imonmonitor ti Philippine Atmospheric, Geophysical and Astronomical Services Administration (PAGASA) iti dayaen ti Southern Mindanao, a mabalin a sumrek iti Philippine Area of Responsibility (PAR) sakbay nga agngudo ti lawas ken managanan iti “Ramil” apaman nga agbalin a tropical cyclone.
Segun iti waragawag ti PAGASA ita nga aldaw, Oktubre 14, saan unay a dakkel ti posibilidadna nga agbalin a tropical cyclone ti nasao nga LPA iti las-ud ti 24 nga oras, ken mabalin a sumrek daytoy iti PAR inton Huebes (Oktubre 16) wenno Biernes (Oktubre 17).
Kuna ti PAGASA a mabalin nga umasideg ti LPA iti Northern Luzon iti ngudo ti lawas, ket mangyeg iti tudo iti nadumaduma a paset ti rehion.
Nupay kasta, adayo latta ti LPA iti PAR ken mabalin nga agbaliw pay ti turongenna kadagiti sumaruno nga al-aldaw. (Merlina Hernando-Malipot/Manila Bulletin//Lito Hilidon/Bannawag)
