Saanen a makitinnulong dagiti agassawa a kontraktor a da Curlee ken Sarah Discaya--a kangrunaan a nairaman kadagiti naanomalia a flood control project--iti imbestigasion nga isaysayangkat ti Independent Commission for Infrastructure (ICI), segun ken ni ICI Executive Director Brian Hosaka ita nga aldaw, Oktubre 15.
Kuna ni Hosaka a mapan a ₱78 a bilion ti gatad ti naala dagiti construction company a kukua dagiti Discaya manipud kadagiti naanomalia a flood control project.
Dinakamat dagiti agassawa ti right against self-incrimination, wenno ti kalintegan a saan nga agsao iti banag a mausar a maibusor kadakuada iti maysa a kaso.
Kuna ni Hosaka nga imbabawin dagiti Discaya ti panagtulokda a makipaset iti imbestigasion idi maammuanda a saanda a kualipikado nga agbalin a kas state witness, kas iti namnamaenda.
Retirado a heneral, nakemmeg gapu iti panangsugsog a mangtippuog iti gobierno
Inlawlawag ni Hosaka nga ipagarup dagiti Discaya a no makitinnulongda iti ICI, makaalada iti rekomendasion nga agbalin a kas state witness.
Natakuatan dagiti Discaya nga awan ti gundawayda nga agbalin a kas state witness, manipud iti pananginterbiu ni Karen Davila iti maysa a kameng ti ICI a ni Rogelio Singson idi Oktubre 13.
Gapu iti daytoy, saandan nga agparang ken makitinnulong iti panagimbestigar ti ICI.
Ngem kuna ni Hosaka a saan nga apektaran daytoy ti panagimbestigarda, ta umdasen dagiti naipaay a testimonia ken affidavit dagiti Discaya tapno mabukel ti kaso a maipila kontra kadagiti nairaman iti naanomalia a flood control project.
Innayon ni Hosaka nga adda nayon nga impormasion manipud iti sabasabali pay a resource person a mabalin a tumulong iti kaso, ket pagsisilpuenda dagitoy tapno maammuanda no ania ti pudno a napasamak, ken idarumda dagiti amin a mairaman. (Joseph Pedrajas/Manila Bulletin//Lito Hilidon/Bannawag)
