Namnamaen ni Presidente Marcos Jr. a maluktanen ti Camalaniugan-Aparri Bridge a mamagsilpo iti Aparri ken iti ili ti Camalaniugan iti Cagayan inton Paskua.
Daytoy ti kinuna ni Marcos iti pananginspeksionna iti rangtay idi Oktubre 14.
Napateg ti naipatakder a Camalaniugan-Aparri Bridge ta 6,000 a behikulo ti inaldaw a mangusar iti daytoy.
Malaksid iti usarna, dinayaw pay ni Marcos ti kinapintas ti disenio ti rangtay, a Filipino met laeng ti nangdisenio. Agbalor ti 1,580 a metro a cable-stayed bridge iti ₱2.34 a bilion.
Nabotosan, baro nga opisial ti Ilocos Sur Provincial Capitol Press Corps
"Kitkitaentayo ti maysa kadagiti kapipintasan a rangtay iti Filipinas, ket siraragsakak a mangibaga a nairingpas daytoy iti umno a tiempo ken umisu ti pannakaaramidna," kuna ni Marcos.
Narugian ti pannakaaramid ti rangtay idi Mayo 2020, ken 99 a porsiento ti nairingpasen idi Septiembre 30, 2025.
Ti Camalaniugan-Aparri Bridge ti mangipaay iti alternatibo a ruta iti Magapit Suspension Bridge, ti kakaisuna a rangtay a mangballasiw iti Cagayan River iti amianan ti Cagayan, a masarakan iti Magapit iti ili ti Lal-lo. (Betheena Unite/Manila Bulletuin//Lito Hilidon/Bannawag)
