Diniskualipikar dagiti hues ti International Criminal Court (ICC) Appeals Chamber ni chief prosecutor Karim Khan iti kaso ni dati a presidente Rodrigo Duterte gapu iti posible a conflict of interest.
Maibasar iti kopia ti desision a nakita ti Reuters, maparitanen ni Khan a makiraman iti pannakausig ti kaso ni Duterte a crimes against humanity (murder).
Idi Agosto, kiniddaw dagiti abogado ni Duterte ti pannakadiskualipikar ni Khan, gapu ta maibilang a conflict of interest ti panangtulongna kadagiti biktima ti war on drugs ni Duterte nga umasideg iti ICC.
Segun ken Nicholas Kaufman, abogado ni Duterte, masapul nga awanen ti akem ni Khan iti kaso ta nagpaayen nga abogado ti Philippines Human Rights Commission (PHRC) a nangitudo ken ni Duterte a kas kangrunaan a suspek, ket agbanag a saanen a patas ti panagimbestigarna.
Mapukpukaw a nobia, nasarakan iti Pangasinan
Inkalintegan ni Khan iti ICC Appeals Chamber nga awan ti conflict of interest iti panagpaayna nga abogado ti daulo ti PHRC ken iti agdama nga akemna a kas chief prosecutor.
Iti pangngeddeng ti Appeals Chamber itay Oktubre 2 a di pay naipablaak, kunada a mabalin a nagparang a saan a patas ni Khan iti naglabas nga akemna ken saan a mapalubosan a makiraman iti kaso, ket pinatganda ti kiddaw ti depensa.
Iti sabali a bangir, ni ICC Deputy Prosecutor Mame Mandiaye Niang ti mangig-iggem iti kaso a maibusor ken ni Duterte sipud idi awan ni Khan. (Reuters/Manila Bulletin//Lito Hilidon/Bannawag)
