Indatag ti kampo ni Senador Francis "Chiz" Escudero idi Oktubre 14 ti affidavit a mangilawlawag iti inawatna a campaign donation nga aggatad iti ₱30 a milion, manipud iti maysa a contractor idi Mayo 2022 election.
Segun iti abogado ni Escudero a ni Ramon Esguerra, indatagdan a nasapsapa ti sungbatda kas panangraem iti proseso ti Commision on Elections (Comelec), ket inkalinteganda a legal, naideklarar, ken mayannurot iti nabayagen a gagangay nga aramid ti nasao a donasion.
Patien ni Esguerra nga awan ti masarakan ti Comelec a basol ni Escudero.
Iti biang ti Comelec, kinuna ni Comelec Chairman George Erwin Garcia a kompleton dagiti kasapulanda tapno tamingenda ti kaso.
DOH, namakdaar iti posible a pannakadangran iti Traslacion
Inlawlawag ni Garcia a saan a ti Commission En Banc ti mangikeddeng iti daytoy, no di ket ti Political Finance and Affairs Department (PFAD) ti Comelec, ta isu ti mangisayangkat iti panagkalap iti datos ken panagimbestigar, isu nga adda kadakuada no idarumda dagiti contractor agraman ni Escudero.
Segun ken ni Garcia, nag-inhibit isuna iti kaso gapu ta nagpaay idi a kas abogado ni Escudero, ket itaklinnan iti PFAD no ania ti rumbeng a maaramid. (Dhel Nazario/Manila Bulletin//Lito Hilidon/Bannawag)
