Nangipaay dagiti gobierno ti Canada, Taiwan, ken United Arab Emirates (UAE) iti tulong kadagiti biktima ti magnitude 6.9 a ginggined a nangdayyeg iti probinsia ti Cebu dua a lawasen ti napalabas.
Iti maysa nga statement, kinuna ni Secretary of State for International Development ti Canada Randeep Sarai a mangtedda iti agdagup ti $650,000 a para iti humanitarian assistance a mangsuportar kadagiti relief efforts iti Filipinas.
Iti statement, kunana nga adda mailatang a $350,000 iti World Vision Canada babaen ti Canadian Humanitarian Assistance Fund a mausar iti panaggatang iti maited nga ayuda ken temporario a pagyanan, danum, para iti salaknib, agraman dagiti mausar iti sanitasion ken serbisio ti kinadalus.
Adda maited a $250,000 babaen ti Philippine Red Cross iti Cebu babaen ti Emergency Disaster Assistance Fund, nga imatonan ti Canadian Red Cross.
Marcos, Robredo, nagsarak iti Naga city
Maited ti $50,000 iti Angat Pinas Inc., maysa a non-profit nga organisasion a binangon ni dati a bise presidente ken Naga City Mayor Leni Robredo, manipud iti Canada Fund for Local Initiatives para iti pannakaiwaras dagiti “dignity and hygiene kits" ken temporario a pagyanan.
Inwaragawag met ti Taiwan ti panangtedda iti $200,000 a donasion tapno matulongan dagiti biktima ti ginggined iti Cebu.
Nayawat ti tulong iti gobierno probinsial ti Cebu manipud iti gobierno ti Taiwan ken Representative Wallace Minn-Gan Chow ti Taipei Economic and Cultural Office in the Philippines (TECO) babaen ti Manila Economic and Cultural Office (MECO), nga imbagian ni Deputy Resident Representative Cherbett Karen Maralit.
Nangiruar met ti gobierno ti UAE iti “urgent relief aid” kadagiti agarup 40,000 a pamilia nga inapektaran ti ginggined, babaen ti UAE Aid Agency nga iwardas ti Embahada ti UAE iti Manila.
Pinasingkedan ni UAE Ambassador to the Philippines Mohamed Obaid Alqataam Alzaabi ti panangsuportarda iti Filipinas kas panangipakita iti nasinged a relasion ti dua a pagilian nga agpauten iti 50 a tawen. (Raymund Antonio/Manila Bulletin//Lito Hilidon/Bannawag)
