Binilin ni Ombudsman Jesus Crispin "Boying" Remulla ni Sekretario ti Department of Public Works and Highways (DPWH) Vivencio "Vince" Dizon a kitaenna ti posible a pakainaigan dagiti agassawa a Discaya iti construction company ti ama ni Senador Christopher "Bong" Go kadagiti naanomalia a flood control project.
Segun ken ni Dizon, nagsaritada ken ni Remulla idi Oktubre 15 kalpasan nga imbabawi dagiti agassawa a contractor a da Curlee ken Sarah Discaya ti pannakitinnulongda iti panagimbestigar ti Independent Commission for Infrastructure (ICI).
Iti maysa nga interbiu, mamati ni Remulla nga ilislisi dagiti Discaya ti pannaki-partner-da iti negosio iti CLTG Builders a kukua ti pamilia ni Bong Go.
Maibasar iti report ti Philippine Center for Investigative Journalism (PCIJ), ti ama ken kabsat ni Go ti akinkukua iti CLTG a maysa kadagiti kompania a nakaala iti ₱4.6 a bilion a proyekto manipud iti DPWH iti napalabas a dekada.
Senado, pinasingkedanna ti ₱6.793-trilion a nailian a badiet para 2026
"Kitkitaenmi ti koneksion dagiti Discaya ken ti CLTG, kas nagsaritaanmi ken ni Ombudsman idi rabii, ket addan planomi nga aramiden kadagiti sumaruno nga al-aldaw," kuna ni Dizon kadagiti kameng ti media ita nga aldaw, Oktubre 16.
Kinuna ni Dizon a saan nga agpangadua a mangimbestigar ken ni Go, a nasinged a tao ni dati a presidente Rodrigo Duterte, ta masapul a kutkotenda ti ania man nga alegasion ti panagkunniber, uray sadino ti pangiturongan kadakuada ti ebidensia. (Joseph Pedrajas/Manila Bulletin//Lito Hilidon//Bannawag)
