Binalusingsing ti Korte Suprema (SC) ti pangngeddeng ti Commission on Elections (Comelec) a nangdiskualipikar ken ni Edgar R. Erice kas kandidato iti kinadiputado ti 2nd District ti Quezon City iti eleksion idi Mayo 2025.
Iti pangngeddeng ti SC nga insurat ni Associate Justice Henri Jean Paul Inting a naipablaak idi Oktubre 15, binaliktad ti SC En Banc ti desision ti Comelec a nangdiskualipikar ken ni Erice gapu iti maipagarup a panaglabsingna iti Omnibus Election Code (OEC).
Maipuon daytoy iti mapapati a pananglabsing ni Erice iti Section 261(z)(11) ti OEC, a mangiparit iti panagiwaras kadagiti palso ken makariribuk nga impormasion mainaig iti pannakayimprenta dagiti balota, pannakaitantan ti eleksion wenno ti pannakaangay ti eleksion, no dagiti naisawang ket mangsinga iti proseso ti eleksion.
Idi Abril 2024, adda sinao ni Erice iti media, a kinunana a dagiti automated counting machine nga ipaay ti Miru Systems (Miru) ket saan pay a nausar iti ania man nga eleksion iti sangalubongan.
Mapukpukaw a nobia, nasarakan iti Pangasinan
Kinuestionar ni Erice ti kontrata ti Comelec ken Miru nga aggatad iti ₱18 a milion, ken ti pannakamanipular ti naaramid a bidding.
Inkamang ni Erice ti pangngeddeng ti Comelec iti SC a nangipaulog iti temporary restraining order (TRO) a nanglapped iti pannakaipatungpal ti disqualification order ti Comelec kontra kenkuana.
Inkalintegan ni Erice nga awan ti linabsingna gapu ta ti pannakaiparit iti panagiwaras iti palso wenno makariribuk nga impormasion ket mayaplikar laeng kadagiti naisawang iti mismo nga eleksion ken iti uneg ti voting centers. Innayonna a dagiti insawangna ket paset ti nasalakniban a kalinteganna nga agsao.
Iti panangamong ti SC iti petision ni Erice, dinakamatda ti Section 1(c)(3)(viii) ti Comelec Resolution No. 11046, nga agkunkuna a dagiti laeng makabael a korte ti mabalin a mangdiskualipikar iti maysa a kandidato no natakuatan a nakabasol ti kandidato iti panaglabsing iti OEC wenno iti Local Government Code iti sabali a panangbista.
Impaganetget ti SC a ti pinal a desision ti korte ti pagibasaran iti pannakadiskualipikar ti maysa a kandidato.
Innayon ti SC a nupay adda karbengan ti Comelec nga agimbestigar kadagiti panaglabsing iti paglintegan ti eleksion, kas sagudayen ti OEC, dagiti Regional Trial Court ti addaan iti bileg a mangipato no agpayso nga adda naaramid a panaglabsing.
Iti kaso ni Erice, kuna ti SC a saan a sinurot ti Comelec ti umisu a legal a proseso iti panangideklararda a nakabasol ni Erice, ken ti panangdiskualipikarda kenkuana.
Kuna ti SC a ti pannakaiparit iti panagiwaras iti palso ken makariribuk nga impormasion ket saan a karaman kadagiti makaigapu iti pannakadiskualipikar ti kandidato segun iti Section 68 ti OEC. (Rey G. Panaligan/Manila Bulletin//Lito Hilidon/Bannawag)
