Kinuna ni Presidente Marcos Jr. a masindadaan nga ipaayna ti Statement of Assets, Liabilities, and Net Worth (SALN)-na iti asino man nga agkiddaw, kas paset ti panangiganetget ti gobierno a mangisubli iti transparency ken accountability.
Daytoy ti kinuna ni Marcos kalpasan nga inikkat ti Office of the Ombudsman dagiti restriksion iti pannakagun-od kadagiti nadakamat a dokumento.
Iti pannakisaritana kadagiti reporter, kinuna ti presidente a suroten ti administrasionna ti dati a wagas a mangipalubos iti nalaklaka a pannakagun-od ti publiko kadagiti SALN dagiti opisial ti gobierno--maysa a sistema a napaliiwna a sinuspenso ti napalabas nga administrasion a Duterte.
“Surotentayo dagiti daan a pagannurotan,” kinuna ni Marcos kalpasan ti panagsapata dagiti baro a nabotosan nga opisial ti Malacañang Media Group idi Mierkoles, Oktubre 15.
Mapukpukaw a nobia, nasarakan iti Pangasinan
Segun ken ni Marcos, nasdaaw idi naammuanna, idi nagtakemen a kas presidente, a kasla imposiblen ti pananggun-od kadagiti kopia dagiti SALN dagiti public official.
Kinuna nga ipaayna ti bukodna nga SALN iti asino man a pormal a mangkiddaw, pakairamanan ti Independent Commission for Infrastructure (ICI) ken ti Office of the Ombudsman.
“Silulukatto ti SALN-ko para iti asino man a mayat [a mangkita],” impanamnamana iti publiko.
“No kiddawen ti ICI, siempre, itedko. No kiddawen ti Ombudsman, itedko,” innayonna.
Kinuna pay ti presidente nga ibilinna kadagiti kameng ti gabinetena nga aramidenda met ti kasta.
Sakbayna, kinuna ni Presidential Communications Office (PCO) Undersecretary Claire Castro a suportaran ni Marcos ti ania man nga addang a “makatulong a manglaban iti panagkunniber” ken tungpalen ti Executive Department ti linteg ken ania man a maibilang a kasapulan para iti transparency. (Argyll Cyrus Geducos/MANILA BULLETIN)
