Naipan iti Tropical Cyclone Wind Signal (TCWS) No. 1 ti adu a lugar gapu ta pimmigsa ni Tropical Depression Ramil bayat ti ilalabasna iti Philippine Sea, segun iti Philippine Atmospheric, Geophysical and Astronomical Services Administration (PAGASA) ita nga aldaw, Oktubre 17.
Nasaripatpatan ti PAGASA ni Bagyo Ramil iti 760 a kilometro iti daya ti Virac, Catanduanes itay 11:00 ti aldaw, nga agpigsa iti 55 a kilometro iti kada oras ken pugso nga agingga iti 70 a kilometro iti kada oras, ket agpaabagatan a laud iti kapardas a 25 a kilometro iti kada oras.
Naipan iti TCWS No. 1 dagiti ili ti Quezon (Tagkawayan, Perez, Alabat, Quezon, Atimonan, Padre Burgos, Unisan, Gumaca, Plaridel, Agdangan, Pagbilao, Mauban, Calauag, Guinayangan, Lopez, Pitogo, Macalelon, General Luna, Catanauan, San Narciso, Buenavista, San Francisco, San Andres, ken Mulanay), agraman Pollilo Islands, Camarines Norte, Camarines Sur, Catanduanes, Albay, Sorsogon, Burias Island, ken Ticao Island.
Iti Kabisayaan, naipan iti Signal No. 1 ti Northern Samar, ti amianan a paset ti Eastern Samar (San Policarpo, Arteche, Oras, Dolores, Maslog, Jipapad, Taft, ken Can-Avid), ken ti amianan a paset ti Samar (Matuguinao, San Jose de Buan, Calbayog City, Gandara, Santa Margarita, Pagsanghan, ken San Jorge).
Phivolcs: Bulkan Mayon, nagtalinaed nga aktibo
Kuna ti PAGASA a mabalin nga agdisso ni Ramil iti Catanduanes inton malem ti Sabado (Oktubre 18) sakbay nga agpalaud-amianan a laud iti Aurora wenno Quezon inton bigat ti Domingo (Oktubre 19).
Tuparen ni Ramil ti Northern ken Central Luzon, sa rummuar iti West Philippine Sea inton malem wenno rabii ti Domingo.
Rummuar ni Ramil iti Philippine Area of Responsibility inton malem wenno rabii ti Lunes (Oktubre 20). (PNA//Lito Hilidon/Bannawag)
