Imbilin ti pre-trial chamber ti International Criminal Court (ICC) a maisayangkat ti medical examination ni dati a presidente Rodrigo Duterte tapno maammuan ti pudno a kasasaadna, no kabaelanna met laeng a sanguen ti kasona a crimes against humanity of murder.
Iti siam a panid a dokumento a nairuar idi Oktubre 16, a pinirmaan dagiti hues ti Pre-Trial Chamber I (PTC I) a da Iulia Antoanella Motoc, Reine Adélaïde Sophie Alapini-Gansou, ken María del Socorro Flores Liera, kiniddawda a mabukel ti multidisciplinary panel a pakairamanan ti forensic psychiatrist, neuropsychologist, ken eksperto iti geriatric ken behavioral neurology, a mangeksamen iti kasasaad ni Duterte.
Segun iti PTC I, tingitingen dagiti madutokan nga eksperto dagiti sumaganad: (1) no adda ania man a sakit a sagsagabaen ni Duterte a mabalin a mangapektar iti kabaelanna a sumurot ken makipaset iti maaramid a pre-trial proceeding, agraman ti confirmation of charges hearing; ken (2) no adda isingasingda a wagas wenno pamuspusan tapno mataming ti kasasaad ti salun-at ni Duterte, segun iti matakuatanda, bayat ti pre-trial proceedings, ken ti confirmation of charges hearing.
Nupay kasta, inlawlawag ti PTC I nga adda latta kadakuada ti karbengan a mangikeddeng mainaig iti kasasaad ni Duterte, ta agbatayda iti linteg. Innayon ti PTC -I a saan laeng a ti medikal a kasasaad ni Duterte ti pagibasaranda, no di ket ti kabaelanna a mangipakat iti kalinteganna iti proseso.
Mapukpukaw a nobia, nasarakan iti Pangasinan
Inikkan ti PTC- I dagiti eksperto iti agingga iti Oktubre 31 a mangidatag iti report-da iti Registry mainaig iti kasasaad ni Duterte.
Kalpasanna, mabalinton a mangidatag ti depensa, ti prosekusion ken ti Office of Public Counsel for Victims (OPCV) iti komentoda inton Nobiembre 5. (Raymund Antonio/Manila Bulletin//Lito Hilidon/Bannawag)
