Naidarum ni dati a mayor ti Nrvacan, Ilocos Sur Luis "Chavit" C. Singson ken dadduma pay a tattao iti kaso a plunder ken graft iti Office of the Ombudsman (OMB) gapu iti pannakapribado ti foreshore land wenno publiko a daga iti igid ti baybay ken mapapati nga overpriced a panaggatangda iti ₱149.96 milion a sanikua manipud iti Western Textile Mills, Inc.
Dagiti reklamo, indatag ti Warriors Ti Narvacan, Inc. nga imbagian ti presidentena a ni abogado Estelita D. Cordero ken sumagmamano nga umili ti Narvacan.
Malaksid iti graft, naidarum pay iti administratibo ni Singson, a dati pay a gobernador ti Ilocos Sur, ken dagiti kakaduana.
Nainaganan iti draft charge, a kakadua ni Singson, dati a general manager/chief executive officer ti Philippine Tourism Authority (PTA) Robert Dean S. Barbers, Luzviminda Ramos a manager ti Tourism Lodge ken caretaker ti foreshore area a pagaammo a lokal a kas "Santorini," ken ni Provincial Environment and Natural Resources Officer (PENRO) Rosemarie Jornacion.
Marcos, Robredo, nagsarak iti Naga city
Segun iti darum, iIlegal nga inokupar ken pinagbalin a pribado ni Singson ken dagiti dadduma pay a a respondent ti foreshore area iti Brgy. Sulvec, Narvacan. Naakusaran dagitoy a nagaramid kadagiti estruktura nga awanan iti permiso wenno environmental clearance.
Naakusaran met ni Barbers a nangipatungpal iti 2008 Deed of Sale babaen ti panangyakarna iti publiko a daga iti kompania ni Ramos, nga awan ti pammalubos ti presidente ti pagilian.
"Dagiti nadakamat nga aramid, nakaigapu iti di umisu a pannakadangran ti gobierno, panaglabsing kadagiti linteg ti aglawlaw, ken nangipakita ti panagabuso iti turay ken panagkokomplot kadagiti respondent," nailanad iti darum.
Iti kaso a plunder babaen ti Section 1(d)(6) ti Republic Act No. 7080, malaksid pay ken ni Singson, nadarum pay da bise mayor ti Narvacan Pablito V. Sanidad Sr., dagiti konsehal a da Edna C. Sanidad, Joseph A. Tejada, Jovenniano B. Ampo Jr., Charito C. Viloria, Bernadette C. Lim, Loreto C. Caballes, Emiliano C. Clarin, Reina Alexa V. Antolin, Romulo C. Rea, ken Joemar Gray A. Cabico; kasta met ti assessor ti munisipio a ni Arlene Debina; ken ti pannakabagi ti Western Textile Mills Inc. a ni Raymond Ang.
Nailanad iti darum a mapapati a nagkokomplot da Singson ken dagiti kakaduana a nangallilaw iti munisipio babaen ti panangipatungpalda iti aglablabes ti presiona a panaggatang iti 99,974-square-meter a sanikua a sakupen ti TCT No. T-31735 manipud iti Western Textile Mills, Inc. iti gatad a ₱149,961,000 iti laksid ti aktual a balor daytoy a ₱49,987,000 laeng maibatay iti zonal valuation.
"Ti maipagarup nga overpricing a dandani ₱100 a million, buklen ti ill-gotten wealth iti sidong ti Republic Act No. 7080," nailanad pay iti darum.
Segun pay iti darum, naibaga pay a "nagtignay ni Singson a kas main plunderer, a nangirugi ken nakipatang iti panaggatang, bayat a dagiti kameng ti Sangguniang Bayan, dagiti assessor, ken ni Ang, nakipasetda a kas kakaduana a nagkokomplot."
Malaksid iti pannakaipila ti plunder kadagiti respondent, kalikagum dagiti nagdarum ti preventive suspension ni agdama a mayor ti Narvacan Edna Sanidad, kasta met ti lifestyle check kadagiti respondent, ken ti pannakaisubli ti ₱99,974,000 a katukad ti overpriced a kantidad. (Czarina Nicole Ong Ki/MANILA BULLETIN)
