Inadmitir ni Senate President Pro Tempore Panfilo “Ping” Lacson ita nga aldaw, Oktubre 20, nga adda nadagsen a pagbanaganna no isuna manen ti agbalin a daulo ti nabileg a Blue Ribbon Committee (BRC) ti Senado, a maysa ditoy ti panagsisina ti majority bloc a mangitunda iti panagbaliw ti liderato ti Senado.
Impalgak ni Lacson a nakapatangnan ni Senate President Vicente “Tito” Sotto III mainaig iti daytoy a banag idi imparipirip ni Sotto a kayatna nga isubli ni Lacson a daulo ti BRC.
Kuna ni Lacson nga agsaganada a dua ta mabalin a mangpataud iti panagsisina iti mayoria ti aramidenna.
Inamiris ni Lacson ti panaglusulosna iti Oktubre 6.
Senado, pinasingkedanna ti ₱6.793-trilion a nailian a badiet para 2026
"Ania ti pagsasaritaantayo a BRC no mapukaw met ti mayoria, ket agturay ti minority bloc nga idadauluan ni Cayetano?" kinuna ni Lacson.
Nupay saanna a kinompirmar ti panagsublina a kas daulo ti BRC, impaganetgetna a no kasta ti aramidenna, ammona ti pagbanagan ti tignayna.
Ni Sen. Erwin Tulfo ti agpapaay ita a kas acting chairman ti BRC.
Itay kallabes, kinuna ni Sotto a mabalin a maisubli ni Lacson a kas daulo ti BRC, ken anamongan ti kaaduan iti mayoria ti panagpaayna manen a daulo ti komite. (Dhel Nazario/Manila Bulletin//Lito Hilidon/Bannawag)
