Nagkaykaysa dagiti mayor iti Nueva Vizcaya a manglaksid kadagiti gandat a baro a panagminas iti probinsia, ket indeklararda ti napinget a panangkontrada kadagiti exploration and extraction project a kayat nga isayangkat dagiti kompania ti panagminas, a kunada a mamagpeggad iti aglawlaw ti probinsia ken kadagiti tattao.
Iti maysa a resolusion a naadaptar idi Oktubre 8, inyebkas ti League of Municipalities of the Philippines (LMP)–Nueva Vizcaya Chapter ti “napinget a panangkontra” kadagiti amin a madama ken masanguanan nga aplikasion para iti exploration and mining permits iti probinsia.
Inaramid dagiti mayor ti pagtaktakderanda bayat ti madama nga exploration nga isaysayangkat ti kompania ti Briton a Woggle Corp. iti lima a barangay iti ili ti Dupax Del Norte, a sumangsango itan iti nainget nga ibubusor dagiti umili.
Nabotosan, baro nga opisial ti Ilocos Sur Provincial Capitol Press Corps
Nupay kasta, napaliiw dagiti grupo a kontra iti panagminas iti probinsia a dagiti laeng masanguanan a panagminas ti sakupen ti resolusion ti liga dagiti mayor.
Inusar dagiti mayor ti 1987 a Konstitusion ken ti Kodigo ti Lokal a Gobierno ti 1991, a mangimanmandar iti Estado ken kadagiti lokal a gobierno a mangsalaknib iti pagimbagan ti publiko ken mangitandudo iti natimbeng ken nasalun-at nga ekolohia.
Kinunada a ti Nueva Vizcaya, naparaburan kadagiti nabunga a dagdaga nga agrikultural, nadalus a taudan ti danum, narangpaya a kabakiran, ken nabaknang a biodiversity, a napateg para iti sustainable development dagiti komunidadna.
“Makadidigra ti makadadael a dadakkel a panagminas saan laeng nga iti aglawlaw no di ket iti mismo a pagbiagan dagiti tattao,” nailanad iti resolusion.
Nairuar ti deklarasion sumagmamano nga aldaw kalpasan nga inusar ti Woggle ti lokal a puersa ti polisia tapno ipilitda a walinen ken serken ti barikada iti kalsada iti Barangay Bitnong, ket nakipinnapilitda kadagiti umili a mangikagkagumaan a manglapped iti iseserrek dagiti drilling equipment ken tattao ti Woggle
Kinuna dagiti lokal nga opisial a nakaigapun iti social ken ecological a pakaseknan dagiti aktibidad ti Woggle kadagiti apektado a barangay.
Dinakamat dagiti mayor ti nakas-ang a pakasaritaan ti probinsia kadagiti operasion ti panagminas, a nakaigapuan ti pannakadadael ti aglawlaw, polusion iti danum, ken pannakapatalaw dagiti komunidad kadagiti napalabas a tawen.
Ti utdtudo dagiti mayor ket ti dua nga agtultuloy a dadakkel nga operasion ti panagminas--ti Didipio gold-copper mine ti Oceanagold Philippines, Inc. iti ili ti Kasibu ken ti Runruno gold-molybdenum venture ti FCF Minerals Corp. iti ili ti Quezon.
Pinasingkedan dagiti mayor ti "di makir-in a pagtaktakderanda” a panangkontra iti large-scale a panagminas, nga inyunay-unayda ti akem ti Nueva Vizcaya kas probinsia a puon dagiti ubbog (watershed province) a mangsupsuplay iti nadalus a danum kadagiti kadarapat a rehion ken mangsupsuportar iti rinibu a pamilia dagiti mannalon.
