Mayallatiw iti Medical Assistance to Indigent and Financially Incapacitated Patients (MAIFIP) ti ₱156 a milion a naikkat iti pondo ti Office of the Vice President (OVP) para iti 2026, segun ken ni House Committee on Appropriations Chairperson Nueva Ecija 1st district Rep. Mikaela Angela "Mika" Suansing, idi Oktubre 20.
Ti MAIFIP ti maysa a programa nga imatmatonan ti Department of Health (DOH) para kadagiti benepisiarioda a marigrigat a Filipino.
Kuna ni Suansing a masapul a maiwaras ti badiet para kadagiti tulong pinansial kadagiti nadumaduma nga ahensia kas iti DSWD (Department of Social Welfare and Development), DOH (Department of Health), wenno DOLE (Department of Labor and Employment).
Aggatad iti ₱733 a milion ti badiet ti OVP, nga idadauluan ni Bise Presidente Sara Duterte, a nailatang iti 2025 General Appropriations Act (GAA).
DOH, namakdaar iti posible a pannakadangran iti Traslacion
Nagbalin laengen a ₱746 a milion ti badiet ti OVP nga inaprobaran ti Kamara iti 2026 General Appropriations Bill (GAB) kalpasan nga inmosion ni Deputy Minority Leader Mamamayang Liberal (ML) Party-list Rep. Leila de Lima idi Oktubre 13 a kissayanda ti badiet ti OVP gapu iti saan nga idadar-ay ni Duterte kadagiti budget hearing ti Kamara.
Kinuna ni Suansing a maysa kadagiti kondision iti pananganamongna a makissayan ti badiet ti OVP ket ti pannakaannurot ti ingangato ti sueldo dagiti empleado ti OVP, tapno adda latta met umdas a pondoda. (Ellson Quismorio/Manila Bulletin//Lito Hilidon/Bannawag)
