Impila ni dati a senador Antonio Trillanes IV iti Ombudsman ti kaso a plunder a maibusor ken ni dati a presidente Rodrigo Duterte ken Senador Christopher Lawrence "Bong" Tesoro Go gapu iti panangtedda iti ₱7 a bilion a balor ti proyekto a para iti impraestruktura ti gobierno kadagiti kompania a kukua ti pamilia ni Go.
Dua a kabagian ni Go ti nairaman iti kaso nga impila ni Trillanes iti Office of the Ombudsman (OMB) ita nga aldaw, Oktubre 21, gapu iti panaglabsing iti Plunder Law (Republic Act No. 7080), iti Anti-Graft and Corrupt Practices Act (Republic Act No. 3019), ken iti Code of Conduct and Ethical Standards for Public Officials and Employees (Republic Act No. 6713).
Saan a daytoy ti damo a panangidarum ni Trillanes kada Duterte ken Go iti kaso a plunder.
Idi Hulio 2024, nangipila ni Trillanes iti kaso a plunder kontra kada Go ken Duterte iti Department of Justice, ket ni Benedicto Malcontento, a Prosecutor General idi, ti nangyendorso iti OMB iti isu met la a bulan, ngem winaswas daytoy ti dati nga Ombudman a ni Samuel Martires idi Hunio itoy a tawen. (Bannawag News Team)
