Mangrugi inton Nobiembre 5, ngumaton ti matgedan dagiti trabahador ken katulongan (kasambahay) iti Rehion 2 kalpasan nga aprobaran ti Regional Tripartite Wages and Productivity Board (RTWPB) a pannakaingato ti sueldo, kas inwaragawag ti Department of Labor and Employment (DOLE).
Segun iti DOLE, kinompirmar ti National Wages and Productivity Commission (NWPC) a maingato iti ₱40 ti inaldaw a tangdan dagiti agtrabtrabaho iti sektor ti agrikultura ken ₱20 ti maingato kadagiti awan iti sektor ti agrikultura.
Manipud iti ₱480 agbalinen a ₱500 ti inaldaw a minimum wage kadagiti agtrabtrabaho iti ruar ti sektor ti agrikultura iti rehion.
Kastoy met laeng ti ngumatuan dagiti adda iti sektor ti agrikultura.
Marcos, Robredo, nagsarak iti Naga city
Inaprobaran met ti RTWPB ti ₱500 nga inaldaw a sueldo ti agpapaay a kas katulongan (kasambahay) kadagiti amin a probinsia, siudad ken ili iti rehion.
Agbalinen a ₱6,500 ti kababaan a binulan a sueldo dagiti katulongan, uray ania pay ti income class ti ili a pagpapaayanda. (Trixee Rosel/Manila Bulletin//Lito Hilidon/Bannawag)
