Sinupiat ni Senador Christopher Lawrence “Bong” Tesoro Go ti panangidarum kenkuana ni dati a senador Antonio Trillanes IV iti Office of the Ombudsman (OMB).
Itay Oktubre 21, indarum ni Trillanes da Go ken ni dati a presidente Rodrigo Duterte iti kaso a plunder ken graft.
Segun ken ni Trillanes, binilion a pisos ti balor dagiti proyekto a naala ti tatang ni Go (akinkukua iti CLTG Builders) ken ti kabsatna nga akinkukua iti Alfrego Builders, manipud iti kontrata ti gobierno manipud idi 2008 a panagpaay ni Duterte a kas mayor ti Davao City, agingga iti agdama.
Kinuna ni Trillanes a naki-partner ti CLTG Builders iti St. Gerrard Construction, a kukua dagiti agassawa a contractor a da Curlee ken Sara Discaya, tapno maalada ti kontrata ti gobierno nga agbalor iti ₱816 a milion idi presidente ni Duterte manipud 2016 agingga iti 2022.
Mapukpukaw a nobia, nasarakan iti Pangasinan
Ngem kinuna ni Go a dagiti kaso nga impila ni Trillanes a maibusor kadakuada a dua ken ni Duterte ket maulit-uliten ken pammadakes laeng.
Kuna ni Go, a nagpaay kas special assistant idi presidente ni Duterte, nga agpatulong koma ni Trillanes iti Commission on Audit (COA) tapno makitana no adda anomalia iti negosio ti pamiliana.
Impaganetget ni Go a nabayagen a negosiante dagiti kameng ti pamiliana, ken pinaritanna ida a sumrek iti kontrata iti gobierno idi nagbalinen nga opisial ti gobierno.
Kinuna ni Go a no adda anomalia wenno irregularidad kadagiti proyekto nga inaramid ti pamiliana, masapul nga idarum ni Trillanes dagiti mismo a tao a nairaman iti anomalia. (Hannah L. Torregoza/Manila Bulletin//Lito Hilidon/Bannawag)
