Impilan ti Philippine National Police (PNP) ti pannaka-dismiss wenno pannakaikkat iti serbisio ti polis a mapapati a nangpapatay babaen ti pammaltog iti maysa a konsehal ti barangay ken ti kabbalay daytoy iti Barangay 21, San Agustin, San Nicolas, Ilocos Norte idi Oktubre 19, 2025..
Nabigbig dagiti biktima a da barangay kagawad Joshua Bernardo, 26, ken ti partner-na a ni Eloisa Bonilla, 30.
Segun iti imbestigasion dagiti autoridad, madama a mangmangan dagiti dua iti beranda ti pagtaenganda iti nasao a barangay, a kaduada ti maysa pay a tao, idi pagammuan ta adda nagsardeng a motorsiklo nga awanan palaka iti batogda ket dimsaag ti dua a lallaki a dagus nangpalpaltog kadagiti biktima.
Natay a dagus ti konsehal, idinto a naideklarar ti a dead on arrival iti asideg nga ospital ti partner-na. Nasugatan met ti kaduada, a naammuan a ni Mark John Bernardo, 25, ket naitaray iti ospital tapno maagasan.
Nabotosan, baro nga opisial ti Ilocos Sur Provincial Capitol Press Corps
Naglibas a nagmotor met laeng dagiti pimmaltog,. Nakemmeg dagiti autoridad ti maysa kadagiti suspek iti isu met la nga aldaw ket naammuan a maysa a polis daytoy.
Kinompirmar ni Police Captain Sygman Benigno, hepe ng San Nicolas MPS, a kameng ti PNP ti nakemmeg a suspek, addaan asawa ken anak, ken maysa a korporal a nakadestino iti Tourist Police Unit ti Ilocos Norte Police Provincial Office.
Segun ken ni Acting PNP Chief Lt. Gen. Jose Melencio Nartatez Jr., iti maysa nga statement idi Martes, Oktubre 22, maipila ti maitutop a kriminal ken administratibo a kaso kontra iti nasao a police corporal (a di nainaganan).
Segun kadagiti report, mabalin a gapu iti panagselos ken love triangle ti motibo ti krimen. (rva)
