Napigsa nga angin ken bayakabak ti marikna ti Batanes, a naipanen iti Tropical Cyclone Wind Signal (TCWS) No. 2 gapu ken ni Bagyo Salome, segun iti Philippine Atmospheric, Geophysical and Astronomical Services Administration (PAGASA) ita nga aldaw, Oktubre 23.
Nasaripatpatan ti PAGASA ni Bagyo Salome iti baybay ti Sabtang, Batanes nga agpaabagatan-abagatan a laud iti kapardas a 20 a kilometro kada oras.
Agpigsa ni Salome iti 65 a kilometro kada oras iti asideg ti sentrona, ken pugso nga agingga iti 90 a kilometro kada oras.
Naipan iti Signal No. 1 ti laud a paset ti Babuyan Islands (Calayan Is., Dalupiri Is., Babuyan Is.), ken ti amianan a laud a paset ti Ilocos Norte (Bangui, Pagudpud, Burgos, Pasuquin, Bacarra, Laoag City).
Mapukpukaw a nobia, nasarakan iti Pangasinan
Segun iti PAGASA, mabalin nga umasideg wenno lumabas ni Salome iti Babuyan Island ken Ilocos Norte ita nga aldaw. (Ma. Cristina Arayata/PNA//Lito Hilidon/Bannawag)
