Winaswas ti Office of the Ombudsman (OMB) dagiti kasi a panagkunniber a naipila kontra iti dati a gobernador ti Cebu a ni Gwendolyn Garcia, a nangbabalaw a dagus iti nangidarum kenkuana.
Awan ti probable cause a nasarakan ti OMB tapno a maidarum ni Garcia, agraman ni contractor Anthony James Limchesing, iti kaso a panagkunniber maipuon iti desilting project.
Indarum ni Moises Deiparine, a maysa a pribado nga umili, ni Garcia a gobernador idi ti Cebu gapu iti maipagarup a panangtedna iti saan a nainkalintegan a pabor iti Shalom Construction Inc. nga ibagian ni Limchesing, babaen ti intedna nga special permit for desilting operations iti Mananga River iti Talisay City nga awan ti environmental clearance manipud iti DENR.
Nangipaulog ti OMB nga idadauluan pay laeng idi ni Samuel Martires, iti preventive suspension a maibusor ken ni Garcia bayat nga ad-adalenda ti reklamo.
Senado, pinasingkedanna ti ₱6.793-trilion a nailian a badiet para 2026
Iti resolusion a naipaulog idi Agosto 29, inkeddeng ti Special Panel of Investigators ti OMB nga awan ti umdas nga ebidensia a nalabsing ni Garcia ti Section 3(e) of Republic Act 3019, wenno ti Anti-Graft and Corrupt Practices Act.
Segun iti Ombudsman, awan ti naited ti nangidarum nga umdas nga ebidensia a nakabasol ni Garcia, ket nakurang ti legal ken napudno a pagibasaran ti reklamo.
Nabang-aran ni Garcia iti desision ti Ombudsman, ket inkarina nga agsubli inton sumaruno nga eleksion. (Calvin Cordova/Manila Bulletin//Lito Hilidon/Bannawag)
