Saan a pinatgan ti Pasig Regional Trial Court (RTC) Branch 159 ti kiddaw ni Apollo Quiboloy a maipasidong iti hospital arrest.
Iti pammilin nga impaulog ni acting Presiding Judge Rainelda Estacio-Montesa idi Oktubre 8, kinunana nga awan ti naimbag a rason tapno a maipasidong ni Quiboloy iti hospital arrest iti Philippine Heart Center wenno iti Medical City.
Ti hospital arrest, kaipapananna ti pannakaiditene ti maysa nga akusado iti ospital, imbes nga iti detention, maipuon iti kasasaad ti salun-atna.
Kiniddaw ti abogado ni Quiboloy a mapalubosan koma daytoy a mapan agpaagas iti sabali nga ospital, saan nga iti ospital a tinudingan ti korte.
Mapukpukaw a nobia, nasarakan iti Pangasinan
Inagal ni Quiboloy a marigatan nga umanges, agsublisubli ti gurigorna, agut-ot dagiti piskelna, ken aguy-uyek bayat ti kaaddana iti uneg ti detention.
Sinupiat dagiti prosecutor ti mosion ni Quiboloy, ket kinunada a ti edad ni Quiboloy, ken ti kasasaad ti salun-atna ket saan a mangilasin kenkuana kadagiti dadduma a balud iti Pasig City Jail, nga adu kadakuada ti agsagaba met kadagiti isu met laeng wenno nakarkaro pay a sakit.
Segun iti Pasig RTC, nalawag kadagiti rekord a kabaelan ti Pasig City Jail nga ipaay dagiti medikal a kasapulan ni Quiboloy, ken agtultuloy ti pannakaipaay ti umisu, nadaras, ken umdas a pannakatagiben ti salun-atna iti Pasig City General Hospital, iti babaen ti panangtaripato dagiti nalalaing a doktor ken nars sadiay. (Benjamin Pulta/PNA//Lito Hilidon/Bannawag)
