Ipatungpal ni Ombudsman Jesus Crispin Remulla ti dismissal order a naipaulog idi 2016 a maibusor ken ni Senador Joel Villanueva, maipuon iti di umno a pannakausar ti ₱10 million Priority Development Assistance Fund (PDAF).
Daytoy ti kinuna ni Remulla ita nga aldaw, Oktubre 23, kalpasan nga inwaragawagna iti media a patulodanna iti surat ni Senate President Vicente “Tito” Sotto III tapno ipatungpalna a dagus ti pammilin ti Ombudsman idi 2016.
Segun ken ni Remulla, ania ngarud ti serserbi ti OMB no yaleng-aleng laeng dagiti pammilin daytoy?
Maipalagip a ni dati nga Ombudsman Conchita Carpio-Morales ti nangipaulog iti dismissal order kontra ken ni Villanueva idi 2016 kalpasan a masarakanda a nakabasol ni Villanueva iti Grave Misconduct, Serious Dishonesty, and Conduct Prejudicial to the Best Interest of the Service.
Pannakakombiktar ti tallo a polis a nangpapatay ken ni Kian delos Santos, pinatalgedan ti Korte Suprema
Naited ti PDAF ni Villanueva iti National Agri-Business Corporation (Nabcor) idi 2008 tapno maipatungpal ti “agri-based livelihood projects in the various congressional districts in Region XI,” ken ti Aaron Foundation Philippines Incorporated (AFPI) ti nagpaay a kas implementing non-government organization (NGO).
Iti panangalada kadagiti seedling, ganagan, ken tresher a para kadagiti mannalon, natakuatan dagiti imbestigador ti Ombudsman a dagiti napili nga ili ket saan a maitutop a pagtalonan ken adda dagiti ghost beneficiary.
Nupay kasta awan nagmamaayan ti dismissal order nga impaulog ni Morales.
Gapu iti daytoy, panggep ni Remulla a yuman iti hudikatura ti pammilin a pannaka-dismiss ken pannakasuspenso iti kameng ti Kamara ken Senado, malaksid iti panagkiddawna iti tulong ti senate president.
Ngem kinuna ni Remulla a no bilang saan a ma-dismiss ni Villanueva, ikamangna daytoy a kaso iti Korte Suprema. (Czarina Nicole Ong Ki/Manila Bulletin//Lito Hilidon//Bannawag)
