Inkari ti Armed Forces of the Philippines (AFP) ita nga aldaw, Oktubre 24, a salaknibanda ti Konstitusion iti baet ti pananggutigot dagiti dadduma a grupo a makiraman koman ti militar kadagiti mapaspasamak iti politika gapu kadagiti maipagarup nga isyu ti panagkunniber kadagiti proyekto iti impraestruktura ti pagilian.
Daytoy ti inkumit ni AFP Chief Gen. Romeo Brawner Jr. kalpasan ti report nga adda dagiti manggutgutigot iti militar nga agtignayda gapu kadagiti protesta ti publiko a mangsupsupiat iti panagkunniber kadagiti flood control project ken dadduma pay a proyekto a para impraestruktura ti Department of Public Works and Highways (DPWH).
"Salaknibantayo ti pagilian, ti Konstitusion, ken ti autoridad," kuna ni Brawner iti maysa nga interbiu iti DZRH.
Impakdaar ni Brawner a dagitoy a pananggutigot, no maaksionan, ket mabalin a mangitunda iti destabilization ken nakaro a pannakadadael iti ekonomia ken iti panagraem ti internasional a komunidad iti pagilian.
Mapukpukaw a nobia, nasarakan iti Pangasinan
Segun ken ni Brawner, no makibiang ti AFP kas iti napasamak idi EDSA 1 ken EDSA 2, tallo ti mabalin a mapasamak: kudeta wenno panangrabsut iti turay, withdrawal of support, ken military junta. Inlawlawagna nga ania man kadagitoy ti mapasamak, saan a nasayaat ti epektona iti pagilian ta maapektaran ti ekonomia, ken ti kasasaad ti pagilian iti internasional a komunidad, ta awanton ti agpautang ken matengngel dagiti asset ti pagilian.
Kuna ni Brawner nga agtultuloy ti panangpaliiw ti AFP iti situasion ken agtalinaed a silulukat ti komunikasion kadagiti soldado babaen ti panangpatibker iti morale ken disiplina iti militar.
Kuna ni Brawner nga ad-adalen ti Philippine National Police (PNP) dagiti mabalin nga ipila a kaso kontra kadagiti retirado a heneral ken dadduma pay a tattao a mangsulsulbog iti militar a mangikkat iti suportada ken ni Presidente Ferdinand Marcos Jr.
Innayon ni Brawner nga agtalinaed ti AFP a natibker ken propesional. (Martin Sadongdong/Manila Bulletin//Lito Hilidon/Bannawag)
