Saan a pinatgan ti International Criminal Court (ICC) ti panangkuestionar ni dati a presidente Rodrigo Duterte iti hurisdiksionda kadagiti krimen a nakaidarumanna mainaig iti war on drugs idi presidente isuna, a mangitunda iti pannakaituloy ti legal a proseso.
Iti 32 a panid a dokumento nga impalgak ti Pre-Trial Chamber I (PTC I) ti ICC idi Oktubre 23, saan nga apektaran ti panagikkat ti Filipinas iti ICC idi 2019 ti hurisdiksionda kadagiti krimen a maipagarup a naaramid iti kameng pay laeng ti ICC ti pagilian.
Segun kadagiti hues, saan a mabalin nga abusuen dagiti pagilian ti kalinteganda nga umikkat iti Rome Statute babaen ti panangabbongda kadagiti tao a sumango iti hustisia kadagiti krimen nga im-imbestigarendan.
Inkalintegan ti abogado ni Duterte a ni Nicholas Kaufman a gapu ta immikkaten ti FIlipinas iti ICC sakbay a naiwayat ti sibubukel nga imbestigasion, awan ngarud ti karbengan ti ICC a mangituloy iti kaso ni Duterte. Impakaammo dagiti Prosecutor nga inwayatda ti preliminary examination iti kasasaad ti Filipinas idi Pebrero 2018, idinto nga imbilin ni Duterte ti yiikkat ti Filipinas iti ICC iti sumaruno a bulan.
Senado, pinasingkedanna ti ₱6.793-trilion a nailian a badiet para 2026
Saan nga inanamongan dagiti hues daytoy, ket kunada a ti preliminary examination nga inwayat ti prosecution idi 2018 ket umdasen a mangikabil kadagiti maipagarup a krimen iti "panangusig" sakbay a nagbalin nga epektibo ti pannakaikkat idi Marso 2019.
Maibasar iti paglintegan ti ICC, ti panagikkat ti maysa nga estado ket saan a mangapektar kadagiti banag nga addan iti biang ti ICC.
Saan a nairaman iti daytoy a pangngeddeng ti ICC ti sabali pay a mosion ti abogado ni Duterte nga isardengda ti pannakausig ni Duterte gapu iti maipagarup a kasasaadna a “not fit to stand trial.”
Nangdutoken dagiti hues iti agwaywayas a panel dagiti eksperto iti medisina a mangtingiting iti kasasaad ni Duterte, ket manamnama nga idatagda ti report-da inton arinunos ti Oktubre.
Manamnama nga addan pinal a desision ti ICC no kabaelan ni Duterte ti sumango iti pannakausig inton Nobiembre.
Idi apagtapog ti Oktubre, saan a pinatgan ti PTC I ti kiddaw ni Duterte nga interim release, ta masapul nga agtalinaed ni Duterte iti detention ti ICC kas maibasar iti Rome Statute. (Argyll Cyrus Geducos/Manila Bulletin//Lito Hilidon/Bannawag)
